Walang confidential funds para sa OVP sa panukalang 2027 budget

Walang nakalaang confidential funds para sa Office of the Vice President (OVP) sa panukalang 2027 national budget. Ito ang kinumpirma ni House Committee on Appropriations Vice Chairperson Representative Jose Alvarez, nitong Miyerkules.

Ayon kay Alvarez, hindi humiling ang OVP ng confidential funds para sa susunod na fiscal year.

“Wala. Nothing, nothing,” ani Alvarez sa isang ambush interview. 

“Kaya nasa Pangulo na kung bibigyan niya ng confidential funds ang Office of the Vice President. Nasa kanyang pagpapasya iyon,” dagdag niya. 

(“None. Nothing, nothing. So it is up to the President if he will give confidential funds to the Office of the Vice President. That is his discretion.”)

Naging sentro ng usapin ang confidential funds sa impeachment proceedings laban kay Vice President Sara Duterte, partikular ang paggamit ng OVP sa confidential funds noong 2022 at 2023, gayundin noong siya ay kalihim pa ng Department of Education (DepEd).

Nauna nang naglabas ang Commission on Audit (COA) ng notices of disallowance na may kaugnayan sa paggamit ng confidential funds ng OVP sa nasabing dalawang taon. Mula noon, hindi na nakatanggap ng confidential funds ang ahensya.

Debate sa parliamentary courtesy

Nagkaroon ng debate sa panukalang budget ng OVP sa pagdinig ng House Committee on Appropriations matapos igiit ni BH Party-list Representative Robert Nazal na bigyan ang tanggapan ng parliamentary courtesy.

Sa ilalim ng tradisyunal na parliamentary courtesy, maaaring maipasa ang budget ng mga co-equal branch at matataas na tanggapan ng pamahalaan nang walang interpellation. Nauna nang ipinagkaloob ng komite ang parehong pribilehiyo sa Office of the President isang araw bago ang pagdinig ng OVP.

“Kahapon, ipinagkaloob ng komiteng ito sa Office of the President ang matagal nang parliamentary courtesy, at ipinasa ang budget nito nang walang interpellation bilang pagkilala sa katayuan nito bilang isang co-equal branch ng pamahalaan. Ngayon, magalang kong hinihiling ang parehong courtesy para sa Office of the Vice President,” ani Nazal.

(“Yesterday, this committee extended to the Office of the President a long-standing courtesy, passing its budget without interpellation in recognition of its standing as a co-equal branch of government. Today, I respectfully ask the same courtesy for the Office of the Vice President.”)

Binanggit din ni Nazal ang mga nagpapatuloy na legal na laban na kinakaharap ng Bise Presidente bilang dahilan ng kanyang mosyon.

“Kasalukuyang humaharap ang Bise Presidente sa impeachment proceeding, na isang mabigat na pasanin. Bukod dito, hindi naman lumaki ang kanyang budget. Nanatili itong katamtaman at hindi kapansin-pansin,” sabi ni Nazal.

(“The Vice President is currently facing the weight of an impeachment proceeding, a burden already heavy enough on its own. Her budget, moreover, has not grown. It remains modest and unremarkable.”)

Gayunman, ilang mambabatas ang tumutol sa mosyon, kabilang si House Deputy Minority Leader at ACT Teachers Party-list Representative Antonio Tinio.

Matapos magtanong ni Alvarez, pumayag si Nazal na pansamantalang bawiin ang kanyang mosyon nang ipahayag ni OVP Chief of Staff Zuleika Lopez ang kahandaang sagutin ang mga tanong ng mga mambabatas.

Dahil dito, sumailalim sa pormal na pagsusuri ng komite ang panukalang budget ng OVP.