VP trial: Mga senador tinutunton ang ₱96 milyong inilipat sa pamamagitan ng BPI Manager’s Checks

Sinuri nang mabuti ng mga senator-judge nitong Miyerkules ang serye ng mga transaksiyon gamit ang manager’s check na umabot sa mahigit ₱96 milyon at nakaugnay sa joint account sa Bank of the Philippine Islands (BPI) nina dating Pangulong Rodrigo Duterte at Vice President Sara Duterte. Sinikap nilang alamin kung paano nakaapekto ang mga transaksiyon sa mga balanse ng account sa pagtatapos ng taon.

Nakatuon ang pagdinig sa legal na katayuan at kung makikita pa ang mga pondo kapag ito ay ginawang manager’s check.

Ipinaliwanag ni BPI division head Marwin L. Galvez sa Senate impeachment court na kapag bumili ng manager’s check, agad na ibinabawas ang kaukulang halaga sa account ng may-ari at inililipat sa internal manager’s-check settlement account ng BPI.

Dahil dito, hangga’t hindi pa naiincash o outstanding ang tseke, hindi na makikita ang kaukulang pondo sa buwanang balanse ng pinagkunang account.

Ayon kay prosecution representative Atty. James Bryan Ibrahim Alih, sangkot sa mga transaksiyon ang dalawang time deposit na nagkakahalaga ng tinatayang ₱41 milyon at ₱55 milyon.

Iginiit ni Alih na ginamit ang mga pondong ito sa pagbili ng manager’s checks na hindi nai-cash, kalaunan ay ibinalik sa bangko, at muling inilabas bilang mga bagong tseke sa anim na cycle mula Marso 2011 hanggang Oktubre 2013.

Sa kanyang pagtatanong sa korte, sinabi ni Senator-judge Vicente “Tito” Sotto III na tinatawag umanong “tinikling” ng mga nasa industriya ang ganitong paulit-ulit na proseso.

“Yung daw pag-issue ng manager’s check, pagkatapos hindi ginagamit, later on, after 31st of December, ibabalik—ang tawag daw doon, ‘tinikling,’” sabi ni Sotto.

Sinabi naman ni Galvez na hindi siya pamilyar sa naturang termino.

Humingi naman ng paglilinaw si Senator-judge Francis “Kiko” Pangilinan kung paano nakaapekto ang mga transaksiyong ito sa year-end figures ng BPI Julia Vargas branch account na nagtatapos sa numerong 9539. Nakalista bilang mga account holder sina “Rodrigo Roa Duterte or Rodrigo Roa Duterte and Sara Z. Duterte.”

“So by December 31, wala ’yung ₱41 million, at least doon sa unang example, doon sa bank account?” tanong ni Pangilinan.

“Tama po, Your Honor,” sagot ni Galvez, na kinumpirmang inilipat ang mga pondo sa settlement account ng BPI habang outstanding ang tseke.

Sa kahilingan ni Pangilinan, iniutos ni Presiding Officer Sen. Francis “Chiz” Escudero sa clerk of court na bigyan ang mga senator-judge ng opisyal na account statements para sa mga partikular na panahong nakabinbin ang mga tseke.

Tinanong naman ni Senator-judge Erwin Tulfo kung epektibong nawala sa mga pampublikong bank statement ang mga pondo habang nagsisilbi sa gobyerno ang mga may hawak ng account.

“Sa pag-convert ng mga pondong ito sa manager’s check, epektibong nawala ang pera sa mga nakikitang buwanang bank statement ng partikular na account number na iyon, tama? (By converting these funds into a manager’s check, the money effectively vanished from visible monthly bank statements of that specific account number, correct?)” tanong ni Tulfo.

“Hindi po siya lalabas as part of the total balance, Your Honor, for as long as nasa manager’s-check account,” sabi ni Galvez. Ipinaliwanag niyang bagama’t hindi na makikita ang pera sa ledger ng pinagkunang account, nananatili naman ito sa sistema ng BPI.

Dagdag niya, kailangan niyang suriin ang detalyadong bank logs upang matukoy kung sino ang kalaunang nag-cash o nagdeposito muli ng mga tseke.

Samantala, nagtanong si Senator-judge Sherwin “Win” Gatchalian tungkol sa know-your-customer (KYC) documentation ng BPI para sa joint account. Kinumpirma ni Galvez na sumailalim sina Rodrigo at Sara Duterte sa standard onboarding process ng BPI at lumagda sa mga kinakailangang KYC form.

Sinabi ni Gatchalian na mahalagang matunton ang galaw ng mga time deposit na umabot sa mahigit ₱96 milyon noong 2010 at 2011 upang maikumpara ang mga ito sa opisyal na Statements of Assets, Liabilities, and Net Worth (SALN) ni Vice President Sara Duterte.

Patuloy na nagsusumite ang prosekusyon ng mga dokumentong pinansyal habang sinusuri ng impeachment court ang mga transaksiyong nauugnay sa vice president at sa kanyang asawang si Atty. Manases Carpio, at inihahambing ang mga ito sa kanyang mga idineklarang ari-arian.