VP Duterte: Wala pang dokumento para tumestigo sa impeachment trial

Sinabi ni Vice President Sara Duterte nitong Biyernes na wala pa siyang natatanggap na abiso na nag-aatas sa kanya na humarap bilang testigo sa kanyang impeachment trial sa Senado.

Ginawa ni Duterte ang pahayag matapos sabihin ng mga prosecutor na plano nilang ipatawag siya upang tumestigo sa impeachment court. Nang tanungin sa Quezon City kung haharap siya sakaling ipatawag, hindi nagbigay ng tiyak na sagot si Duterte.

“Wala pa namang papel o dokumento na nagsasabing kailangan ko mag-appear as witness for the prosecution,” aniya sa isang panayam nitong Biyernes ng umaga.

Nahaharap ang Bise Presidente sa mga kasong impeachment dahil sa umano’y maling paggamit ng confidential funds, panunuhol sa mga opisyal ng gobyerno, hindi maipaliwanag na yaman, at mga banta laban kay Pangulong Ferdinand Marcos Jr., First Lady Liza Araneta-Marcos, at noo’y House Speaker Martin Romualdez, pinsan ng Pangulo.

Ang umano’y mga banta ay paksa rin ng hiwalay na kasong kriminal sa Quezon City Regional Trial Court Branch 98, kung saan personal na humarap si Duterte nitong Biyernes para sa kanyang arraignment. Gayunman, ipinagpaliban ang pagdinig matapos magsumite ng mosyon ang kanyang mga abogado.

Nagkomento rin si Duterte sa plano ng Senate impeachment court na muling pag-aralan ang bilang ng mga boto na kailangan upang mahatulan o mapawalang-sala siya, isang usaping lumitaw kasunod ng pagliban at pagkakadetine ng ilang senator-judge.

Inaasahang maglalabas ng desisyon ang impeachment court sa usapin sa Setyembre 23.

Iginiit ni Duterte na nakapagpasya na ang Senado na sundin ang mga probisyon ng Konstitusyon na namamahala sa mga paglilitis sa impeachment.