VP Duterte, itinanggi ang alegasyon ng dating pulis ukol sa 'maleta-maleta ng pera,' iginiit na taliwas ito sa kanyang 2019 travel records

Pormal na itinanggi ni Vice President Sara Duterte ang mga alegasyon laban sa kanya ng sinibak na pulis na si Rodulfo Gracioso Jr., kasabay ng paghaharap ng mga ebidensiya upang pasinungalingan ang salaysay nito.

Sa isang pahayag, kinumpirma ni Duterte na natanggap ng kanyang legal team mula sa National Bureau of Investigation (NBI) ang kopya ng affidavit ni Gracioso, kasama ang mga pangunahing dokumento ng pagkakakilanlan. Gayunman, sinabi niyang walang kalakip na ebidensiya ang nasabing affidavit.

“Batay sa aming bilang, may 29 na pahayag si Gracioso tungkol sa akin na pinaniniwalaan naming hindi totoo (Based on our count, Gracioso made 29 statements concerning me that we believe are false),” giit ni Duterte.

Binigyang-diin ni Duterte ang mga rekord ng kanyang biyahe na aniya ay direktang sumasalungat sa mahahalagang petsa sa salaysay ni Gracioso, partikular sa mga alegasyon tungkol sa kanyang kinaroroonan noong 2019.

“Bukod sa ilan pang ebidensiya, hindi kami nagpunta ni Jefry Tupas sa Marinduque noong Semana Santa ng 2019, at wala rin kami sa Maynila noong Setyembre 21, 2019 (Among several other pieces of evidence, Jefry Tupas and I were nowhere near Marinduque during Holy Week in 2019, nor were we in Manila on September 21, 2019),” sabi ng bise presidente.

Dating miyembro ng security detail ni dating House Speaker Lord Allan Velasco si Gracioso. Sa kanyang affidavit na isinumite sa NBI, iginiit niyang naghatid siya ng mga maleta na naglalaman ng pera kina Duterte, ama nitong si dating Pangulong Rodrigo Duterte, at Davao City 1st District Representative Paolo “Pulong” Duterte, alinsunod umano sa mga utos ni Velasco. Tinataya ni Gracioso na lumampas sa dalawang bilyong piso ang kabuuang halagang naihatid niya sa bise presidente.

Binanggit ni Duterte na nauna nang nagpahiwatig si NBI Director Melvin Matibag na maaaring magsampa ng kasong perjury o pagsisinungaling sa ilalim ng panunumpa, kung mapatunayang hindi totoo ang mga pahayag sa affidavit. Nagpahayag din siya ng kumpiyansa na kikilos ang NBI matapos makumpleto ang pagsusuri nito sa kaso.

“Inaasahan naming magsasampa ng kaso ang NBI laban kay Gracioso kapag natapos na ng ahensiya ang imbestigasyon at lubusang nasuri ang mga ebidensiya (We expect a case to be filed by the NBI against Gracioso once the agency completes its investigation and the evidence is fully evaluated),” giit pa ni VP Duterte.