Tagapagsalita ni VP Duterte: Testimonya ng AMLC, nagpakita ng mga transaksyon, hindi illicit funds

Mariing kinontra ng kampo ni Vice President Sara Duterte nitong Martes ang mga pahayag na pinagtibay umano ng testimonya ng Anti-Money Laundering Council (AMLC) ang mga alegasyon ni dating senador Antonio Trillanes IV tungkol sa umano’y ilegal na pinagmulan ng yaman ng bise presidente at ng kanyang pamilya.

Sa isang pahayag, iginiit ng tagapagsalita ni Duterte na si Atty. Salvador Paolo Panelo Jr. na kinumpirma lamang ni AMLC Executive Director Ronel Buenaventura ang mga karaniwang ulat ng transaksiyon sa bangko, at hindi ang ilegal na pinagmulan ng pera o kahit kung pagmamay-ari nga ba ito ng bise presidente.

“Kung mayroon mang nakumpirma, ito ay ang ilegal na pagkuha ni Trillanes sa kanyang impormasyon, na paglabag sa Anti-Money Laundering Act at mga batas sa pagiging kompidensiyal ng mga rekord sa bangko (If anything was confirmed, it is only that Trillanes obtained his information illegally, in violation of the Anti-Money Laundering Act and Bank Secrecy Laws),” giit ni Panelo.

Tumugon si Panelo sa naging pagdinig ng impeachment court nitong Lunes, kung saan nagpatotoo si Buenaventura tungkol sa mga pumapasok na transaksiyon sa bangko na kinasasangkutan ng CALE88 Foods Corp., kumpanyang pag-aari ng asawa ni Duterte na si Atty. Manases Carpio.

Sa pagtatanong ni Atty. Mae Divinagracia mula sa panig ng prosekusyon, sinabi ni Buenaventura na nakatanggap ang CALE88 Foods Corp. ng kabuuang ₱319,326,770.41 na mga remittance mula sa mainland China at Hong Kong. Binanggit ng prosekusyon na halos katumbas ito ng mga halagang naunang inilatag ni Trillanes sa isang press conference.

Nauna nang inakusahan ni Trillanes, na kamakailan ay inalis sa listahan ng mga testigo ng prosekusyon, si Duterte at ang kanyang pamilya ng pagtanggap ng milyun-milyong piso na remittance mula sa China at mula sa isang hinihinalang drug lord na nakabase sa Davao City. Iginiit naman ng mga abogado ng prosekusyon na pinatutunayan ng mga dokumento ng AMLC na iniharap sa korte ang ilan sa mga naunang ibinunyag ni Trillanes.

Gayunman, iginiit ni Panelo na hindi sapat ang testimonya upang patunayan ang anumang maling gawain.

“Ang pinatotohanan lamang ng Executive Director ng AMLC ay ang mga ulat na isinumite ng mga bangko tungkol sa mga transaksiyong saklaw ng pag-uulat at mga kahina-hinalang transaksiyon. Hindi niya kinumpirma—dahil hindi niya ito maaaring kumpirmahin—at kailangan pang patunayan ng prosekusyon na ang anumang perang iniuugnay sa bise presidente ay nagmula sa ilegal na gawain, itinago, o talagang pag-aari niya sa simula pa lamang (The AMLC Executive Director merely testified on covered and suspicious transaction reports filed by banks. He did not—because he could not—confirm, and the prosecution still has to prove, that any money attributed to the Vice President was illegally sourced, hidden, or even hers to begin with),” sabi ni Panelo.

Kinuwestiyon din ni Panelo ang kredibilidad ni Trillanes, na tinawag niyang isang “anti-Duterte propagandist” na umaasa sa mga sabi-sabi, tsismis, at haka-haka.

“Hindi nagsasabi ng katotohanan si Trillanes (Trillanes is no truth-teller),” banat ni Panelo, at iginiit na dati nang sinabi ni Senator-Judge Panfilo “Ping” Lacson na walang sapat na bigat bilang ebidensiya ang mga pahayag ng dating senador.

“Mas bagay sa kuwentuhan ang kanyang mga alegasyon, hindi sa korte (His allegations are better suited for the parlor, not the court),” dagdag pa niya.

Naganap ang palitan ng mga pahayag habang nagpapatuloy ang imbestigasyon ng impeachment court sa mga transaksiyong pinansiyal ng bise presidente at ng kanyang mga malalapit na kasama.