Senate impeachment court, pormal nang ipinatawag si Mayor Baste Duterte para tumestigo sa paglilitis sa kanyang kapatid

MANILA — Naglabas na nitong Martes ang Senate impeachment court ng subpoena na nag-uutos kay Davao City Mayor Sebastian “Baste” Duterte na humarap bilang testigo ng prosekusyon sa nagpapatuloy na impeachment trial ng kanyang kapatid na si Vice President Sara Duterte.

Personal na inihatid ng mga tauhan ng Senate Office of the Sergeant-at-Arms ang subpoena sa tanggapan ng alkalde ng Davao City sa kaparehong araw.

Sa ilalim ng kautusan, kailangang humarap si Mayor Duterte sa Senate tribunal mula Setyembre 28 hanggang 30, alas-10 ng umaga, upang tumestigo tungkol sa mga usaping mahalaga sa mga kasong isinampa laban sa bise presidente.

“Inaatasan kang humarap sa Senate Impeachment Court upang magbigay ng iyong nalalaman tungkol sa kasong nakabinbin sa Hukuman, kung saan isinailalim sa impeachment ng House of Representatives si Vice President Sara Zimmerman Duterte (You are hereby commanded to appear before the Senate Impeachment Court… to testify your knowledge in the case which is before the Court in which the House of Representatives has impeached Vice President Sara Zimmerman Duterte),” saad sa kautusan.

Bukod sa personal na pagharap, inatasan din ng tribunal ang alkalde ng Davao na magsumite ng mga certified true copy at electronic version ng mga opisyal na rekord ng pamahalaang lungsod na may kaugnayan sa lahat ng kontrata at transaksiyon nito sa Gencorp Industries Inc.

Hiniling din sa subpoena ang mga rekord ng lungsod na may kaugnayan sa “anumang korporasyon o iba pang entidad na nagmamay-ari o nagpapatakbo ng sangay o establisimyento ng Jollibee” sa Davao City.

Ang mga rekord na hinihingi ng korte ay may kaugnayan sa mga hindi pagkakatugma sa financial disclosures ng bise presidente.

Sa kanyang Statement of Assets, Liabilities, and Net Worth o SALN, idineklara ni Vice President Sara Duterte na stakeholder siya sa Gencorp Industries. Gayunman, sa mga dokumentong isinumite sa Securities and Exchange Commission o SEC, hindi nakalista ang pangalan niya bilang isa sa mga incorporator ng kompanya.

Ito na ang ikalawang subpoena na inilabas para sa Davao City Mayor’s Office kaugnay ng impeachment trial.

Binawi ng impeachment court ang naunang kautusan matapos baguhin ng prosecution panel ang iskedyul nito para sa pagharap ng mga testigo.