Senate impeachment court, pinayagang tumestigo si Tang sa kabila ng pagtutol ng depensa

Pinayagan nitong Lunes ng Senate impeachment court ang House prosecution na iharap bilang testigo si dating Sandiganbayan Presiding Justice Amparo Cabotaje-Tang sa impeachment trial ni Vice President Sara Duterte, sa kabila ng pagtutol ng depensa.

Nagpasya ang impeachment court matapos igiit ng abogado ng depensa na si Mark Vinluan na maaaring mapilitan si Tang na magbigay ng konklusyon sa usaping legal, na aniya ay dapat ipaubaya sa mga senator-judge.

Iginiit naman ng prosekusyon na makatutulong ang kaalaman ni Tang sa mga batas hinggil sa pananagutan ng mga opisyal ng gobyerno upang ipaliwanag ang mga konseptong legal na maaaring hindi pamilyar kahit sa mga abogado.

Sa ika-24 na araw ng paglilitis, sinabi ni House prosecutor at Akbayan party-list Rep. Chel Diokno na ipaliliwanag ni Tang kung anu-anong sitwasyon ang maaaring maging paglabag sa mga batas hinggil sa pananagutan ng mga opisyal, kabilang ang hindi idineklara o hindi maipaliwanag na yaman, ipinagbabawal na interes sa negosyo at iba pang transaksiyong pinansyal.

“May karapatan ang ating mga mamamayan na malaman kung ano ang itinatadhana ng batas pagdating sa hindi maipaliwanag o ilegal na nakuhang yaman, SALN, tunay na pagmamay-ari o beneficial ownership, pinansyal na interes, at iba pang kaugnay na legal na termino. Kaya naniniwala kami na mahalagang mapakinggan ang testimonya ni Justice Amparo Tang, hindi lamang ng hukuman kundi maging ng mga mamamayang pinagmumulan ng kapangyarihan ng hukuman (Our people have a right to know what the law provides when it comes to unexplained or illegally acquired wealth, SALN, beneficial ownership, financial interest, and other relevant legal terms. That is why we believe it is important not only for the court, but also for the people from whom the authority of this court emanates, to hear the testimony of Justice Amparo Tang),” ani Diokno.

Nagbigay rin ng kanilang mga pananaw ang ilang senator-judge, kabilang ang mga nagpahayag ng reserbasyon kung paano dapat ituring ang testimonya ni Tang.

Sinabi ni Senate President at presiding officer Francis Escudero na hindi kailangang gumawa muna ang impeachment court ng pinal na pagtukoy kung kwalipikado si Cabotaje-Tang bilang expert witness.

“Bagama’t maaari siyang maging kuwalipikado bilang eksperto, na maaari namang kuwestiyunin sa cross-examination, hindi nangangahulugang may bisa sa mga hukuman ang anumang sasabihin ni Justice Cabotaje-Tang. Hindi rin pinal o konklusibo sa mga hukuman ang kanyang opinyon (Although she may be qualified as an expert, subject to cross, whatever Justice Cabotaje-Tang will say is not binding on the courts, and her opinion is not conclusive upon the courts),” ani Escudero.

Binigyang-diin din ni Escudero na nakasaad sa pre-trial order na plano ng prosekusyon na magharap ng 15 testigo para sa Article 2 sa loob ng 12 araw.

“Kung nais nilang gamitin ang saksi na ito kasama ng kanilang 15 saksi sa loob ng 12 araw, nasa kanila na iyon. Sila ang magpapasya, ayon sa kanilang pagpapasya at estratehiya, kung sinong mga saksi ang kanilang ihaharap. Bukod dito, nailabas na ang subpoena (If they want to charge this witness against their 15 witnesses in 12 days, that is totally up to them to decide upon and to, in their discretion and strategy, present any witness they may so present. Besides, the subpoena has been issued),” ani Escudero.

Ipinaliwanag din ni Escudero na bagama’t kinakailangang kilalanin ng impeachment court ang mga umiiral na batas, hindi nangangahulugang kailangan nitong tukuyin kung paano naaangkop ang mga batas na ito sa isang partikular na kaso.

Sinabi niyang maaari ring magharap ang depensa ng sarili nitong testigo upang kuwestiyunin o kontrahin ang testimonya ni Tang.

“Kaya papayagan ito ng korte. Ang komento ng counsel na tumugon dito ay kinikilala ng korte. At kung nais ninyo, counsel, maaari ninyong ipatala ang inyong patuloy na pagtutol kaugnay sa saksi na ito, ngunit mananatili siyang sasailalim sa cross-examination (So, the court will allow it. The comment of the counsel to respond is duly noted. And if you want counsel, you can make your continuing objection of record in regard to this witness but still subject to cross),” dagdag ni Escudero.