Sen. Cayetano, hinimok ang mga senator-judge na tanggihan ang posisyon ng bise presidente sakaling mahatulang guilty si VP Sara Duterte

Nanawagan si Senate Minority Leader Alan Peter Cayetano nitong Lunes sa mga kapwa niya senator-judge na hayagang tatanggihan ang anumang alok na maging bise presidente sakaling mahatulang guilty at matanggal sa puwesto si Vice Presidente Sara Duterte.

Sa isang post sa Facebook, sinuportahan ni Cayetano ang naunang pahayag ni Sen. Francis “Chiz” Escudero na tatanggihan niya ang posisyon kung iaalok ito matapos ang posibleng pagkakatanggal kay Duterte sa puwesto.

“Tama po ito! Dapat tayong lahat na mga senador-hukom ay gumawa rin ng ganitong pahayag. (All of us Senator-Judges should make this declaration),” sulat ni Cayetano, at iginiit na kailangang manatiling walang kinikilingan ang mga senator-judge at hindi maimpluwensiyahan ng pansariling interes ang magiging resulta ng paglilitis.

“Mahalagang manatiling neutral sa pulitika ang mga senador-hukom sa lahat ng paglilitis sa impeachment (lalo na sa mga pangulo at bise presidente) at wala silang dapat na maging motibo para hatulan ang isang opisyal na guilty maliban sa mga ebidensiyang nagpapatunay sa mga artikulo ng impeachment (It’s essential that in all impeachment proceedings (especially of Presidents and Vice Presidents), Senator-Judges are politically neutral and will have no incentive to convict except for evidence that proves the article/s of impeachment),” dagdag niya.

Kasunod ang pahayag ni Cayetano ng panayam kay Escudero sa isang podcast na ipinalabas nitong Linggo. Nagbabala si Escudero na magiging malaking salungatan ng interes ang pagtanggap sa posisyon matapos niyang lumahok sa paghatol sa kaso. Gayunman, nilinaw niyang wala pang nag-aalok sa kanya ng naturang posisyon.

Sa ilalim ng 1987 Konstitusyon, kapag nabakante ang posisyon ng bise presidente habang umiiral ang termino ng pangulo, magmumungkahi ang pangulo ng kapalit mula sa Senado o Kamara de Representantes. Kailangang kumpirmahin ang nominado sa pamamagitan ng mayoryang boto ng dalawang kapulungan na magkahiwalay na boboto.

Sa pagtatapos ng kanyang panawagan, hinimok ni Cayetano ang mga kasamahan na pairalin ang karunungan at maingat na pagpapasya sa kabila ng magkakaibang pananaw sa pulitika.

—Sari Story Network