Prosekusyon ng Kamara, hindi na itutuloy ang planong ipatawag si VP Sara Duterte bilang hostile witness

Hindi na itutuloy ng prosecution panel ng Kamara de Representantes ang plano nitong ipatawag si Vice President Sara Duterte bilang hostile witness o saksi na salungat sa panig ng prosekusyon sa paglilitis sa impeachment case laban sa kanya, dahil naniniwala ang pribadong tagausig na si Lorna Kapunan na kakaunti lamang ang bagong impormasyong makukuha mula sa kanyang testimonya.

Ayon kay Kapunan, inaasahan ng prosekusyon na itatanggi lamang ni Duterte ang kanyang kaalaman sa mga alegasyon laban sa kanya, gaya ng naging tugon ng isang naunang hostile witness mula sa Office of the Vice President (OVP).

"Sa lahat ng narinig namin mula sa depensa, ang sasabihin lang niya ay, 'Hindi ko alam.' Iyon lang ang sasabihin niya sa witness stand," ani Kapunan.

"Hindi niya mabibigyang-linaw sa mga senator-judge o sa publiko ang tungkol sa kanyang pananagutan sa paggamit ng pondo ng bayan, hindi maipaliwanag na yaman, at mga seryosong banta laban sa Pangulo, Unang Ginang, at dating Speaker (She is not going to enlighten the senator-judges or the public regarding her accountability for public funds, unexplained wealth, and grave threats against the President, First Lady, and former Speaker)," dagdag niya.

Bagama't kinilala ni Kapunan na ang pagpapatestigo kay Duterte ay magbibigay ng pagkakataon sa prosekusyon na obserbahan ang kanyang asal at kilos habang sumasagot sa mga tanong, sinabi niyang hindi magiging kapaki-pakinabang ang hakbang dahil inaasahan na ang magiging mga sagot nito.

"Magiging mabuti para sa prosekusyon [kung tetestigo siya]. Makikita natin iyong init ng ulo niya, ang pagkalutang niya. Pero magiging ganap na pag-aaksaya lamang ito ng oras ng prosekusyon dahil inaasahan na ang kanyang magiging testimonya," dagdag niya.

Samantala, binigyang-diin nina Kapunan at kapwa pribadong tagausig na si Benjamin Tolosa Jr. na maaari pa ring piliin ng kampo ng depensa na iharap si Duterte bilang saksi. Sa ganitong pagkakataon, magkakaroon ang prosekusyon ng pagkakataong isailalim siya sa cross-examination o pagtatanong upang suriin ang kanyang testimonya.

"Mas magkakaroon ng kontrol ang depensa sa kanyang mga sasabihin at kung paano siya kikilos," paliwanag ni Kapunan.