Prosekusyon, inalis na sa witness list ang dating DepEd disbursing officer sa impeachment trial ni VP Duterte

Inalis na ng House prosecution panel nitong Lunes sa kanilang listahan ng mga testigo si dating Department of Education (DepEd) special disbursing officer Edward Fajarda sa impeachment trial ni Vice President Sara Duterte. Ito ay matapos payuhan ng mga doktor si Fajarda na sumailalim pa sa karagdagang 30 araw na pagpapagaling matapos siyang ma-stroke.

Ipinaalam ni private prosecutor Rey Robles sa Senate impeachment court na hindi na isasalang sa testimonya si Fajarda matapos ang pinakahuling medical assessment, na kinumpirma rin ng mga doktor ng Senado.

“Dahil sa pinakahuling medical update at sa kumpirmasyon ng mga doktor ng Senado, bilang humanitarian consideration, hindi na namin isasalang ang kanyang testimonya,” ayon kay Atty. Robles.

(In view of the latest medical update and the confirmation by the doctors of the Senate, as a humanitarian consideration, we are going to dispense with the testimony.”)

Kasunod nito, iniutos ni Presiding Officer Francis “Chiz” Escudero ang pagbawi sa subpoena na nauna nang inilabas para kay Fajarda.

“Dahil binawi na ang kahilingan para sa subpoena kay Mr. Edward Fajarda, iniuutos ng presiding officer ang pagbawi sa subpoena na inilabas laban sa kanya,”  sabi ni Escudero.

 (Having withdrawn the request for subpoena for Mr. Edward Fajarda, the presiding officer hereby orders the recall of the subpoena issued to him.”)

Ayon kay Escudero, nagsumite si Fajarda, sa pamamagitan ng kanyang abogado, ng isang liham at medical certificate na nagsasaad na kailangan pa niya ng karagdagang 30 araw upang makarekober at makapagpagaling mula sa stroke na naranasan niya humigit-kumulang isang buwan na ang nakalipas. Pinagtibay at kinumpirma rin ng Senate Medical and Dental Bureau ang nasabing medical certification.

Mahalagang bahagi sana si Fajarda sa presentasyon ng prosekusyon kaugnay ng umano'y iregular na paggamit at liquidation ni Duterte ng confidential funds sa DepEd, kung saan nagsilbi siyang kalihim mula 2022 hanggang 2024.

Inaasahan sanang tatalakayin sa kanyang testimonya ang paghawak at turnover ng confidential funds, pati na ang mga acknowledgment receipt na paulit-ulit na naging bahagi ng mga talakayan sa impeachment trial.

Kasunod ng pag-alis kay Fajarda bilang testigo, hiniling ni House lead prosecutor Rep. Gerville Luistro ng Batangas sa korte na ipagpatuloy ngayong Martes, Setyembre 8, ang presentasyon ng mga natitira nilang testigo.

Ayon kay Luistro, susunod na haharap bilang mga testigo sina Police Maj. Jovelyn Magay, Atty. Sunshine Fajarda, at empleyado ng Commission on Audit na si Bresildo Sabaldan.