Paghihigpit sa confidential at intelligence funds, itinutulak ni Sen. Ejercito

Itinutulak ni Senate Finance Committee Chairperson JV Ejercito ang mas mahigpit na limitasyon sa paggamit ng confidential at intelligence funds (CIFs). Giit niya, dapat lamang itong ilaan sa mga ahensiya ng pamahalaan na direktang may tungkulin sa law enforcement, intelligence gathering, at national security.

Sinabi ito ni Ejercito kasabay ng pagsusuri ng mga mambabatas sa alokasyon para sa CIFs para sa panukalang 2027 national budget. Isinasagawa ito sa gitna na rin ng nagpapatuloy na impeachment trial ni Vice President Sara Duterte.

“Confidential and intelligence funds should be limited to agencies whose mandate is law enforcement, intelligence, and national security,” ani Ejercito sa isang panayam.

“Confidential funds do not mean they are unaccountable. Just because they are classified as confidential does not mean they should no longer be subject to accountability,” dagdag niya.

Sa ilalim ng Joint Circular No. 2015-01, ginagamit ang confidential funds para sa surveillance activities ng mga civilian agency, habang ang intelligence funds ay nakalaan sa mga operasyon ng intelligence gathering na isinasagawa ng military, uniformed at intelligence personnel.

Mas naging mahigpit ang pagsusuri sa paggamit ng naturang mga pondo kasunod ng pag-arangkada ng impeachment trial ni Vice President Duterte, na nahaharap sa mga kasong culpable violation of the Constitution, betrayal of public trust, graft and corruption at iba pang high crimes. Pero una nang pinasinungalingan ng kampo ng bise presidente ang mga nasabing paratang sa kanya.

Sa ngayon, hinihikayat naman ni Senate impeachment court spokesperson Reginald Tongol ang publiko na higit na ituon ang pansin sa merito ng kaso.

“What the public should be talking more about is the evidence being presented and the legal theories of both sides,” ani Tongol.