OVP, naghahanda na ng legal na hakbang matapos panindigan ng COA ang ₱73.3-M fund disallowance

Inihayag ng Office of the Vice President (OVP) nitong Miyerkules na naghahanda itong kuwestiyunin ang desisyon ng Commission on Audit (COA) na pagtibayin ang disallowance sa ₱73.287 milyong confidential expenses nito noong Disyembre 2022, bagama’t hindi pa nito opisyal na natatanggap ang kopya ng naturang resolusyon.

Sa isang pahayag, sinabi ng OVP na inaasahan na nito ang posibleng pagtanggi sa motion for reconsideration at nakahanda itong tumugon sa pamamagitan ng mga naaangkop na legal at institusyonal na hakbang.

“Hindi pa natatanggap ng Office of the Vice President ang kopya ng resolusyon ng Commission on Audit na may petsang Oktubre 5, 2026, hinggil sa mosyon para sa muling pagsasaalang-alang kaugnay ng Notice of Disallowance sa mga Confidential Expenses para sa ikaapat na quarter ng 2022 (The Office of the Vice President is yet to receive a copy of the October 5, 2026 Commission on Audit resolution on the Motion for Reconsideration regarding the Notice of Disallowance on Confidential Expenses for Q4 2022)," saad ng OVP.

“Inaasahan na ng tanggapan ang posibilidad ng ganitong desisyon at nakapaghanda na itong tumugon sa pamamagitan ng naaangkop na mga legal at institusyonal na hakbang (The office has already anticipated the possibility of this decision and has prepared to respond through the appropriate legal and institutional channels)," dagdag pa ng tanggapan.

Ibinasura ng COA Commission Proper ang magkasamang mosyon para sa motion for reconsideration na inihain ni Vice President Sara Duterte, OVP Special Disbursing Officer Gina Acosta, at Chief Accountant Julieta L. Villadelrey. Dahil dito, pinal na pinagtibay ang disallowance sa mga paggastos na naganap mula Disyembre 21 hanggang 31, 2022.

Kabilang sa mga gastusing hindi pinayagan ang ₱69.787 milyon na inilaan para sa reward payments at ₱3.5 milyon na ginastos sa mga kagamitan sa opisina, gaya ng mga mesa, upuan, desktop computer, at printer. Ayon sa COA, may mga kakulangan sa mga dokumentong isinumite, kabilang ang kawalan ng katibayan na nakamit ng mga iniulat na aktibidad ang mga nilalayong resulta sa operasyon.

Sinundan ng pinal na pagpapatibay na ito ang naunang desisyon ng COA noong Abril 10, 2026, na inapela nina Duterte at ng dalawa pang opisyal ng OVP nang sumunod na buwan.

Sa kabila ng pagkatalo sa apela, iginiit ng OVP na tuloy-tuloy pa rin ang pangunahing operasyon nito.

“Gayunman, nananatiling nakatuon ang OVP sa pagtupad sa mandato nito na bumuo at magsulong ng mga programang magpapaangat sa buhay ng mga mamamayang Pilipino (Nevertheless, the OVP remains committed to fulfilling its mandate—to develop and promote programs that uplift the lives of the Filipino people)," giit ng tanggapan.