Mga senador, kinuwestiyon ang bisa ng AFP certification para suportahan ang paggamit ng pondo ng DepEd

Kinuwestiyon nina Senator-judges Risa Hontiveros at Joel Villanueva nitong Martes ang bisa ng isang certification mula sa Armed Forces of the Philippines (AFP) na iniharap para bigyang-katwiran ang liquidation ng confidential at intelligence funds ng Department of Education (DepEd).

Sa impeachment trial ni Vice President Sara Duterte, tinanong ni Hontiveros si Philippine Army Col. Manaros Boransing II hinggil sa certification na kanyang inilabas tungkol sa paglahok ng DepEd sa Youth Leadership Summit (YLS) at Information, Education, and Communication (IEC) activities ng Philippine Army.

Inamin ni Boransing sa pagtatanong na walang nakasaad sa dokumento na detalye tungkol sa partikular na halaga, gastusin, o pinagmulan ng pondo na maaaring magpatunay kung magkano ang ginastos ng DepEd sa mga programang pinangunahan ng militar.

"Based on your presentation as a witness, it appears DepEd used your certification as justification for how the department spent its confidential and intelligence funds. But in your certification, did you mention how much DepEd allegedly spent on the Philippine Army’s activities?" tanong ni Hontiveros.

Nilinaw ni Boransing na ang dokumento ay nagpapatunay lamang sa paglahok ng DepEd, kasama ang iba pang stakeholders, at hindi nagpapatunay na naglaan ang kagawaran ng regular, confidential, o intelligence funds para sa mga naturang aktibidad.

Sinabi rin niya na wala siyang personal na kaalaman kung paano ginamit ng DepEd ang confidential at intelligence funds nito kaugnay ng mga aktibidad.

Hiwalay namang kinuwestiyon ni Senator-judge Joel Villanueva si Boransing tungkol sa layunin at saklaw ng mga certification na inilalabas ng militar para sa mga ahensya ng pamahalaan. Tinanong niya kung maaari bang magsilbing lehitimong patunay ng confidential expenditures ang naturang mga dokumento.

"So your exact intention in issuing the certification was merely to confirm that the activities took place?" tanong ni Villanueva.

Sumang-ayon si Boransing at sinabing ang certification ay inilabas lamang upang beripikahin na isinagawa ang mga regular na civil-military operations at dumalo rito ang participating agencies. Binigyang-diin din niya na walang intelligence-gathering activities na isinagawa sa mga youth summit.

Sa pagpapatuloy ng pagtatanong, napagtibay rin ni Villanueva na ang mga civil-military units ay direktang pinopondohan sa ilalim ng regular budget ng Philippine Army at hindi mula sa intelligence funds.