Mga opisyal ng Davao, walang alam sa umano’y GenCorp link ni VP Sara Duterte, ayon kay Mayor Baste

Nilinaw ni Davao City Mayor Sebastian Duterte nitong Lunes na walang kaalaman ang pamahalaang lungsod at mga tauhan nito tungkol sa anumang pinansyal o opisyal na interes ni Vice President Sara Duterte sa Gencorp Industries Inc., isang kompanyang nakakuha ng 19 na kontrata mula sa lungsod mula 2022.

Sa isang opisyal na pahayag, sinabi ni Mayor Duterte na wala sa alinmang dokumentong isinumite ng Gencorp, kabilang ang Articles of Incorporation nito, ang pangalan ni Vice President Duterte o ang apelyidong “Duterte.”

“Wala akong kaalaman, gayundin ang lahat ng iba pang opisyal at empleyado ng City Government of Davao, na may interes si Vice President Sara Z. Duterte sa GENCORP INDUSTRIES INC. (I, and all other officials and employees of the City Government of Davao, never had any knowledge of Vice President Sara Z. Duterte holding an interest in GENCORP INDUSTRIES INC.),” aniya.

Inilabas ng alkalde ang pahayag upang linawin ang tinawag niyang “hindi kumpirmadong mga ulat” na nagsasabing nasa humigit-kumulang ₱14.32 milyon ang naging transaksyon ng lungsod sa kompanya.

Ayon kay Duterte, ipinakita ng kamakailang pagsusuri ng pamahalaang lungsod na umabot talaga sa ₱33,263,161 ang kabuuang halaga ng mga transaksyon sa Gencorp sa 19 na magkakahiwalay na kontratang iginawad mula 2022.

Sa 19 na kontrata:

13 ganap nang natapos.

 6 nagpapatuloy.

4 iginawad sa pamamagitan ng competitive public bidding.

15 nakuha sa pamamagitan ng small-value procurement na pinahihintulutan ng procurement laws.

Binigyang-diin ni Duterte na dumaan sa pagsusuri ang Gencorp sa bawat transaksyon at patuloy nitong natugunan ang mga legal na kinakailangan sa pamamagitan ng pagsusumite ng pinakamababang nakalkulang responsive bid o offer.

Lahat ng 19 na transaksyon ay pinroseso, iniulat at isinapubliko rin sa pamamagitan ng Philippine Government Electronic Procurement System o PhilGEPS.

Iginiit ng alkalde na naging “above board” o naaayon sa batas ang lahat ng transaksyon at hinamon ang mga kritiko na magharap ng beripikadong ebidensya at opisyal na dokumento kung may taliwas na alegasyon sa halip na umasa sa haka-haka.

Nagbabala rin siya laban sa tinawag niyang “mapanlinlang na mga pahayag” at “isinadulang mga naratibo” na aniya ay may motibong pulitikal. Sinabi ni Duterte na minabuti niyang tugunan agad ang isyu bago ang anumang pormal na paglilitis o pagdinig dahil nararapat lamang umanong mabigyan ng buong transparency ang mga residente ng Davao City.