Maaaring kailanganin pa rin ng prosekusyon na ituloy ang bribery charge sa paglilitis kay VP Sara Duterte

MANILA — Hindi maaaring basta-basta na lamang bawiin ng House prosecution panel ang alegasyon ng panunuhol laban kay Vice President Sara Duterte dahil maaari pa ring atasan ng Senate impeachment court ang mga prosecutor na magharap ng ebidensya kung makita ng mga senator-judge na dapat itong ipagpatuloy.

Ito ang paglilinaw ni impeachment court spokesperson Regie Tongol noong Lunes ng gabi, kasunod ng mga ulat na pinag-iisipan ng prosekusyon na alisin ang Article III, na tumutukoy sa alegasyon ng bribery laban kay Duterte.

Ayon kay Tongol, wala pang pormal na mosyon ang House prosecution panel na inihahain sa impeachment court upang alisin ang naturang artikulo.

“Posibilidad pa lamang po iyon (It remains within the realm of possibility),” ani Tongol.

Kung magpasya ang mga prosecutor na hindi na ituloy ang Article III, kailangan muna nilang pormal na humingi ng pahintulot sa impeachment court, gaya ng naging proseso sa impeachment trial kay dating Chief Justice Renato Corona.

“Magmo-motion po yung House prosecution panel to drop the said article na gusto po nilang i-drop (The House Prosecution Panel would have to move to drop the article they want to abandon),” ani Tongol.

Pag-aaralan naman ng mga senator-judge ang mga dahilan ng prosekusyon bago magpasya kung pagbibigyan ang kahilingan.

Aniya, nasa pagpapasya pa rin ng impeachment court kung papayagan nitong alisin ang naturang artikulo.

Maaari ring tanggihan ng impeachment court ang mosyon at atasan ang prosekusyon na ipagpatuloy ang paglalahad ng ebidensya kung makita ng mga senator-judge na kinakailangang ding dinggin ang alegasyon ng panunuhol.

Maaari namang pagbigyan ng korte ang kahilingan ng prosekusyon, na posibleng magpaikli sa natitirang paglalahad ng ebidensya.

Kung tuluyang aalisin ang Article III at matatapos ng prosekusyon ang paglalahad ng ebidensya sa kasalukuyang artikulo, posibleng matapos ng mga prosecutor ang kanilang presentasyon ng kaso ngayong linggo. Magbibigay-daan ito upang simulan ng defense team ni Duterte ang paglalahad ng kanilang mga ebidensya.

Gayunman, binigyang-diin ni Tongol na nakadepende pa rin ang ganitong senaryo sa pormal na mosyon ng prosekusyon at pag-apruba ng impeachment court.

Sa ngayon, sinabi lamang ng House prosecutors sa publiko na pinag-iisipan nilang alisin ang alegasyon ng panunuhol.

Nasa yugto pa ng prosekusyon ang impeachment trial, kung saan nakatuon ang mga pagdinig sa mga ebidensyang pinansyal at dokumentaryo bago bigyan ng pagkakataon ang depensa na iharap ang sarili nitong mga ebidensya.