Kampo ni VP Sara, hinaharang ang pagharap ni Tang sa impeachment trial

Hiniling ng defense team ni Vice President Sara Duterte sa Senate impeachment court na huwag nang payagang tumestigo si dating Sandiganbayan Presiding Justice Amparo Cabotaje-Tang.

Maaari kasi anilang maglaman ang testimonya ni Tang ng mga legal na konklusyon na tanging ang mga senador-judge lamang ang may kapangyarihang gumawa.

Iginiit ng abogado ng depensa na si Atty. Mark Vinluan na lalampas sa simpleng pagpapaliwanag ng mga legal na prinsipyo ang nakatakdang testimonya ni Tang, at maaaring mapilitan ang dating mahistrado na magbigay ng mga legal na konklusyon.

Tumutol din si Vinluan sa pagharap kay Tang bilang sorpresang testigo, dahil hindi umano nabigyan ang depensa ng mga materyales ukol dito nang mas maaga.

“Lalabag ito sa karapatan ng [Bise Presidente] na lubusang malaman ang tunay na katangian at dahilan ng mga paratang laban sa kanya (This will violate [the Vice President’s] right to be completely informed of the true nature and cause of accusations against her),” giit ng abogado, bago tuluyang hilingin na alisin si Tang bilang testigo kaugnay ng artikulo ng impeachment na tinatalakay ng hukuman.

Kinuwestiyon din ng abogado ang katayuan ni Tang bilang testigo. Aniya, hindi naman ito humaharap bilang amicus curiae, o “kaibigan ng hukuman,” at hindi rin pinahintulutan ng tribunal ang kanyang testimonya batay sa kanyang espesyalisasyon.

“Hindi rin naaangkop ang pagharap ni Justice Tang. Hindi siya tumetestigo bilang amicus curiae... Buong paggalang sa kanya, ngunit hindi kailanman nakialam o nagbigay ng pahintulot ang hukuman sa kanyang testimonya batay sa kanyang kadalubhasaan o larangan ng espesyalisasyon (Justice Tang’s presentation is likewise improper. She is not testifying as an amicus curiae... With all due respect to her, the court never intervened or approved her testimony on her expertise or field of specialization),” ayon kay Atty. Vinluan.

“Sa paghingi ng kanyang mga interpretasyon sa mga legal na prinsipyo, nakatakda siyang gumawa ng mga legal na konklusyon na tanging ang marangal na impeachment court na ito lamang ang maaaring magpasya (By asking for her interpretations on legal principles, she is poised to make conclusions of law that only this honorable impeachment court is allowed to make),” dagdag pa niya.

Samantala, ipinagtanggol naman ni House prosecutor at Akbayan Rep. Chel Diokno ang desisyon ng prosekusyon na iharap si Tang bilang testigo.

Ayon kay Diokno, makatutulong ang karanasan ni Tang sa mga batas ukol sa pananagutan ng mga opisyal ng gobyerno upang maipaliwanag sa mga senador-hukom ang mga kumplikadong konseptong legal.

Iginiit din ni Diokno na mahalaga ang testimonya ni Tang upang maipaliwanag ang dahilan ng pagkakabuo ng mga kaugnay na batas at kung paano itinatakda ang pananagutang legal.

“Hindi ipinapaliwanag ng batas kung bakit ito binuo sa isang partikular na paraan. Paano natin mapapanagot ang isang tao kung hindi nila alam ang dahilan sa likod ng batas? (The law does not state why a law is crafted a particular way. How can we hold someone accountable if they do not know the rationale behind the law?),” ayon kay Diokno.