Impeachment trial ni VP Sara: Depensa, wala pang tugon sa pag-alis ng sub judice rule sa mga binawing artikulo

Hindi pa naglalabas ng komento ang panig ng depensa sa paglilitis sa impeachment ni Vice Presidente Sara Duterte hinggil sa desisyon ng Senado na alisin ang sub judice rule sa tatlong Artikulo ng Impeachment na binawi ng prosekusyon, ayon kay Senador-Judge Sherwin Gatchalian nitong Linggo.

Ayon kay Gatchalian, bagama't wala pang natatanggap na tugon ang impeachment court mula sa depensa, bukas pa rin ang hukuman sa pagsusumite ng panig ng depensa ng kanilang tugon.

“Wala pang nakukuhang feedback, kaya tuloy-tuloy naman iyan. Anytime, puwede silang magbigay ng feedback,” ani Gatchalian sa isang panayam.

Kinumpirma rin ng senador na naisumite na ng prosekusyon ang pormal na alok nito ng mga ebidensiya at kasalukuyang hinihintay ang tugon ng depensa.

Noong Martes, inalis ng Senate impeachment court ang restriksiyon sa ilalim ng Rule 18, o sub judice rule, sa Artikulo 1, 3 at 4 matapos aprubahan ang kahilingan ng prosekusyon na bawiin ang mga ito.

Bago bawiin ang mga naturang artikulo, nakapaglalahad na ang prosekusyon ng mga ebidensiya kaugnay ng Artikulo 1 at 4. Tumutukoy ang Artikulo 1 sa umano'y maling paggamit ng confidential funds, habang nakasentro naman ang Artikulo 4 sa umano'y mga banta ni Duterte laban kay Pangulong Ferdinand “Bongbong” Marcos Jr., First Lady Liza Araneta-Marcos at dating Speaker ng Kamara na si Martin Romualdez.

Samantala, tumutukoy ang Artikulo 3 sa umano'y panunuhol sa mga opisyal ng Department of Education (DepEd) noong kalihim pa ng kagawaran si Duterte.

Samantala, nilinaw ni Presiding Officer Francis Escudero na bagama't pinahihintulutan ng pag-alis sa sub judice rule ang pampublikong pagtalakay sa mga alegasyon sa mga binawing artikulo, hindi nito pinahihintulutan ang walang limitasyong pagsisiwalat o pagpapakalat ng mga ebidensiyang naiharap na sa hukuman.

—Sari Story Network