Impeachment court, ibinasura ang mosyon na alisin ang AMLC chief bilang testigo sa VP trial

Ibinasura nitong Lunes ng Senate impeachment court ang mosyon ng defense panel na pigilan ang hepe ng Anti-Money Laundering Council (AMLC) na tumestigo sa impeachment trial ni Vice President Sara Z. Duterte. Nagpasya ang korte na hindi nangangahulugan ang mga patakaran sa confidentiality na hindi na maaaring isailalim sa legal na compulsory process ang mga rekord ng AMLC.

Ibinasura ni Presiding Officer Francis Escudero ang mosyon na alisin sa mga testigo si AMLC Executive Director Ronel Buenaventura, ngunit pinayagan ang depensa na ipagpatuloy ang paghahain ng mga pagtutol habang nagbibigay siya ng testimonya.

“Maaaring tukuyin, patunayan ang pagiging tunay at ipaliwanag ng testigong mula sa AMLC ang mga ulat na tinukoy sa subpoena (The AMLC witness may therefore identify, authenticate and explain the reports specified in the subpoena),” sabi ni Escudero.

Nilinaw ni Escudero na hindi nagbibigay ang ruling ng pahintulot para sa walang limitasyong pagsisiwalat sa publiko ng impormasyon. Maaari aniyang limitahan ang testimonya sa mga bagay na may kaugnayan sa kaso o isagawa ito sa harap ng kamera, o hindi bukas sa publiko, kung kinakailangan.

Iginiit ng depensa na inaatasan ng Section 8-A ng Anti-Money Laundering Act ang AMLC at secretariat nito na protektahan ang mga impormasyong natatanggap o pinoproseso nito at ipinagbabawal ang hindi awtorisadong pagsisiwalat.

Nagbabala rin ang depensa na maaaring malabag ang confidentiality rules kung papayagang tumestigo si Buenaventura at maaaring lumikha ito ng precedent na makaaapekto sa financial records ng iba pang opisyal ng pamahalaan at pribadong mamamayan.

Gayunman, sinabi ni Escudero na kinokontrol ng batas ang paraan at mga kondisyon ng pagsisiwalat ngunit hindi ito nangangahulugan ng “absolute silence under every circumstance.”

Ayon kay Escudero, pinoprotektahan ng confidentiality provision ang impormasyon ng AMLC laban sa pagtagas, walang habas na paglalathala, at hindi awtorisadong pagsisiwalat. Gayunman, hindi nito ipinagbabawal ang pagsunod sa isang legal at partikular na subpoena na may kaukulang safeguards.

Binanggit din ng korte ang Bank Secrecy Law, na tahasang nagpapahintulot sa pagsusuri ng mga bank deposit sa mga impeachment case. Gayunman, nilinaw ni Escudero na hindi nito awtomatikong inaalis ang hiwalay na confidentiality rules na sumasaklaw sa impormasyon ng AMLC.

Bago ilabas ang ruling, sinabi ni Buenaventura sa korte na dumalo ang AMLC bilang pagsunod sa mga subpoena na inilabas ng impeachment court at sa internal rules nito tungkol sa pagpapalitan ng impormasyon.

Sinabi niyang kinikilala ng AMLC ang awtoridad ng korte at sumusunod lamang ito sa mga legal na compulsory process.

Humingi naman si Senator-Judge Pia Cayetano ng nakasulat na kopya ng ruling at oras upang mapag-aralan ang mga batayan nito. Samantala, sinabi ni Senator-Judge Joel Villanueva na nais niyang mailagay sa rekord ang kanyang pananaw na bagama't mahalagang polisiya ang bank secrecy, hindi ito kailanman naging ganap sa mga impeachment proceeding.

Pagkatapos nito, sinabi ng depensa na susunod ito sa ruling habang inilalaan ang karapatan nitong tumutol sa mga partikular na bahagi ng testimonya ni Buenaventura at magsagawa ng cross-examination “ad cautela,” o bilang pag-iingat.

Pinayagan naman ni Escudero ang prosekusyon na simulan ang direct examination kay Buenaventura.