Vice President Sara Duterte, ipinagtanggol ang kaniyang abogado laban sa paratang na ‘mapang-api’

Ipinagtanggol ni Vice President Sara Duterte nitong Miyerkules ang kaniyang legal counsel laban sa paratang na “mapang-api” o “bully,” kasabay ng pagtatanong sa umano’y mga maniobra sa politika kaugnay ng panukalang pambansang badyet para sa 2027.

Sa pahayag na inilabas noong Oktubre 14, inihalintulad ni Duterte sa kuwento nina David at Goliath ang posisyon ng kaniyang defense team. Aniya, pagtatangka itong siraan ang isang abogado na lumalaban sa kabila ng matinding pagpapakita ng kapangyarihan ng kabilang panig.

“Ang pagtawag ni Lorna Kapunan sa isang abogado ng depensa na mapang-api ay katulad ng pagtawag kay David na siyang nang-agaw laban kay Goliath (Lorna Kapunan calling a defense counsel a bully is like calling David the aggressor against Goliath),” ani Duterte.

Inakusahan ng Bise Presidente ang prosecution panel ng Kamara ng pananakot at pagpigil sa mga tauhan ng Office of the Vice President (OVP), hindi pagpapatibay sa mga paratang nito, at pag-asa sa nalalapit na impeachment trial sa Senado upang pagtakpan ang mga kakulangan sa kanilang kaso.

“Matapos ang lahat ng iyon, nasaan ang ebidensiya (After all that, where is the evidence)?”, tanong niya.

Binanggit din ni Duterte ang mga alegasyon ng pamamahagi ng pera at mga maniobra sa politika na iniuugnay sa pambansang badyet para sa 2027. Kinuwestiyon niya kung ginagamit ang pondo ng bayan upang impluwensiyahan ang mga senador na magsisilbing mga hukom sa impeachment trial.

“Ginagamit ba ang badyet para paglingkuran ang sambayanang Pilipino, o naging panakip-butas na ba ito upang gipitin ang mga senador na uupo bilang mga hukom at gantimpalaan ang mga bobotong ‘oo’ sa House of Representatives? (Is the budget being used to serve the Filipino people, or has it become a bargaining chip to pressure senators who will sit as judges and reward those who vote ‘yes’ in the House of Representatives?),” ani Duterte.

Binigyang-diin niyang walang kinalaman ang kaniyang legal team sa anumang transaksiyong pampolitika. Dagdag niya, ilang taon nang naghahanda ang kaniyang mga abogado para sa impeachment case mula pa noong 2023, kapalit ng kanilang oras sa pagtulog, panahon para sa pamilya, at kapanatagan ng isip.

Inilarawan ni Duterte ang mga pagdinig bilang “political theater na nagkukunwaring pananagutan (political theater disguised as accountability)”. Nagbabala rin siya na ang publiko ang nagdurusa kapag ginagamit ang pambansang badyet at mga mekanismo ng impeachment para sa pampolitikang pananatili sa kapangyarihan.

“Hindi nagiging mapang-api ang isang abogado ng depensa dahil lamang tumatanggi siyang hayaang hindi masagot ang inyong mga paratang (A defense counsel does not become a bully simply because she refuses to let your accusations go unchallenged),” dagdag niya.

Nanawagan siya ng “ebidensiya, hindi kayabangan; tunay na pananagutan, hindi pampolitikang pang-uusig (evidence, not arrogance; genuine accountability, not political persecution).”