Baste Duterte, pinadalhan ng subpoena para tumestigo sa impeachment court ng Senado

MANILA – Inatasan ng Senado bilang impeachment court si Davao City Mayor Sebastian “Baste” Duterte at apat pang iba na humarap sa paglilitis sa impeachment, habang inihahanda ng prosekusyon ang pagtalakay sa mga rekord ng gobyerno at mga korporasyong may kaugnayan kay Vice President Sara Duterte. Dahil sa botohan sa Setyembre 23 kaugnay ng pinagtatalunang threshold para sa conviction, kinailangang baguhin ang iskedyul ng pagharap ng mga testigo.

Noong Miyerkules, naglabas si Presiding Officer Francis “Chiz” Escudero ng mga bagong subpoena para kay Civil Service Commission (CSC) Assistant Commissioner Ariel Ronquillo, Philippine Government Electronic Procurement System (PhilGEPS) Division Chief Rendell Sopeña, Duterte, abogado Gary Samonte at Police Major Jerrickson Sangalang.

Nauna nang inilabas ang subpoena para kay Securities and Exchange Commission (SEC) official Gerardo del Rosario kaya hindi na ito kinailangang muling ilabas. Dahil dito, umabot sa anim na katao ang saklaw ng pinakahuling kahilingan ng prosekusyon para sa mga testigo.

Ayon kay Escudero, kailangang baguhin ang mga petsa ng pagharap ng mga testigo dahil magsasagawa ang impeachment court ng oral arguments at boboto sa Setyembre 23 kaugnay ng hamon ni Senator-judge Erwin Tulfo sa interpretasyong 16 na boto ang kinakailangan para sa conviction.

Si Ronquillo ang unang haharap sa susunod na batch ng mga testigo ng prosekusyon, kasunod sina Del Rosario at Sopeña.

“Una naming ihaharap si Attorney Ariel G. Ronquillo ng Civil Service Commission, susundan ni Attorney Gerardo F. del Rosario ng Securities and Exchange Commission, at panghuli, Your Honor, si Mr. Rendell P. Sopeña ng Philippine Government Electronic Procurement System Office ng DBM (We will be presenting first Attorney Ariel G. Ronquillo of the Civil Service Commission, followed by Attorney Gerardo F. del Rosario of the Securities and Exchange Commission, and finally, Your Honor, Mr. Rendell P. Sopeña of the Philippine Government Electronic Procurement System Office of the DBM),” ani House lead prosecutor Rep. Gerville Luistro.

Inaasahang magbibigay si Ronquillo ng testimonya hinggil sa paghahanda, pagsusumite at mga alituntunin para sa Statements of Assets, Liabilities and Net Worth (SALNs), kabilang ang kanyang naging papel sa pagbuo ng mga kaugnay na guideline at sa interpretasyon at pagpapatupad ng mga ito.

Samantala, inatasan si Sopeña na tumestigo tungkol sa mga transaksiyon sa government procurement na kinasasangkutan ng mga entidad kung saan idineklarang may interes si Duterte. Inatasan din siyang ilabas ang mga rekord ng mga kontrata sa pagitan ng Gencorp Industries Inc. at mga ahensiya ng gobyerno mula 2020 hanggang sa kasalukuyan.

Iniutos ni Escudero na humarap sina Sebastian Duterte, Samonte at Sangalang sa Setyembre 23, ngunit sinabi niyang maaaring bawiin at muling ilabas ang kanilang mga subpoena para sa susunod na linggo o mas huling petsa, depende sa takbo ng testimonya ng unang tatlong testigo.

Sinabi niyang makatutulong ang naturang pagbabago upang hindi kinakailangang maantala ang trabaho ng mga opisyal ng gobyerno kung hindi pa kayang isalang ng korte ang kanilang testimonya.

Tiniyak din ni Escudero sa depensa na bibigyan ito ng karagdagang oras para maghanda sa cross-examination matapos baguhin ng prosekusyon ang pagkakasunod-sunod ng mga testigo. Aniya, maaaring ilipat sa hapon ang pagtatanong o unahin muna ang isa pang testigo.

Ugnayan sa Gencorp

Saklaw ng subpoena kay Sebastian Duterte ang mga transaksiyong pinasok ng pamahalaang lungsod ng Davao sa Gencorp Industries, isang kumpanyang kabilang sa mga idineklarang business interest ng Bise Presidente.

Inatasan din siyang ilabas ang mga opisyal na rekord at kontrata mula 2020 hanggang sa kasalukuyan sa pagitan ng city government at mga entidad na nagmamay-ari o nagpapatakbo ng sangay o establisimyento ng Jollibee.

Sinabi ni House trial spokesperson Zia Alonto Adiong ng Lanao del Sur na hindi dapat tingnan ang pagsama kay Baste Duterte bilang prospective witness batay lamang sa relasyon niya sa pamilya ng Bise Presidente.

“Tinatawag siya dahil maaaring mayroon siyang kaugnay na personal at opisyal na kaalaman hinggil sa mga usaping bahagi ng Article II presentation ng prosekusyon (He is being called because he may have relevant personal and official knowledge concerning matters that form part of the prosecution’s Article II presentation),” ani Alonto Adiong sa isang press briefing.

Mahalaga ang Gencorp sa kaso ng prosekusyon hinggil sa hindi maipaliwanag na yaman dahil mismong si Duterte ang nagdeklara ng interes sa naturang kumpanya sa kanyang SALN.

Napabilang si Mayor Duterte sa listahan ng mga testigo ng prosekusyon matapos lumabas ang mga ulat na umano’y nakakuha ang Gencorp ng milyun-milyong pisong food at catering contracts mula sa pamahalaang lungsod ng Davao noong siya ang alkalde.

Ayon sa ulat, nakatanggap umano ang Gencorp ng humigit-kumulang P14.32 milyon mula sa mga transaksiyon sa pamahalaang lungsod ng Davao mula 2022 hanggang 2025. Bahagi ito ng tinatayang P15.02 milyong iniulat na transaksiyon sa gobyerno na kinabibilangan din ng P696,829 mula sa regional office ng PhilHealth sa Davao.

Naganap ang mga iniulat na transaksiyon noong si Sara Duterte ay Bise Presidente at si Sebastian Duterte naman ay alkalde ng Davao City.

Binigyang-diin ni Alonto Adiong na ang pagsama kay Mayor Duterte sa listahan ng mga testigo ng prosekusyon ay hindi nangangahulugang inaakusahan siya ng anumang paglabag.

“Witness si Mayor Baste, hindi respondent. Hindi namin hinihinging idiin niya ang kanyang kapatid. Ang hinihingi namin ay magsabi siya ng totoo tungkol sa mga bagay na personal niyang nalalaman (Mayor Baste is a witness, not a respondent. We are not asking him to incriminate his sibling. What we are asking is for him to tell the truth about the things he personally knows),” aniya.

Plano ng prosekusyon na hilingin ang nararapat na pagtrato sa isang hostile witness kapag humarap na si Duterte sa witness stand, ngunit nakadepende ito sa magiging pasya ng impeachment court.