"Abogadong walang alam", ipinatanggal ng depensa sa record ng Impeachment Court

Nagkainitan ang mga abogado ng prosecution team at defense team sa ika-21 araw ng impeachment trial ni Vice President Sara Duterte.

Iniharap ng prosekusyon ang tagapagsalita at defense counsel na si Atty. Michael Poa na idineklarang hostile witness dahil ito ay panig sa depensa ni Duterte.

Sa paglilitis ay ipina-strike off the record ni Atty. Shiela Sison ng defense counsel ang nasabi ni Atty. Jay Tolosa Jr., ng prosecution team ang katagang "abogadong walang alam".

Inihirit ni Sison ang pagpapatanggal ng katagang sinabi ni Tolosa kay Poa na "abogadong walang alam" at iginiit na may mga karapatan ang testigo laban sa mga irrelevant, hindi tama at nakakainsultong tanong.

"I don’t think that to include in the offer a statement that said ‘Ang abogadong walang alam is proper. Whether here or outside the court, whether we are trying an impeachment case or we’re just talking to one another as to fellow members of the Bar", pahayag ni Sison.

"And I believe I have to ask this court to strike this off the record", dagdag pa ng defense counsel.

Nagpaliwanag naman si Tolosa na hindi niya intensyong insultuhin si Poa at nangtawiran na kaya niya nasabi ang katagang "abogadong walang alam" ay dahil paulit-ulit na sinabi ni Poa sa pagdinig ng Kamara noong 2024 na wala itong nalalaman sa paggamit ng DepEd sa confidential funds gayong siya ang inatasan ni Duterte na tumugon sa audit observation memorandum (AOM) ng Commission on Audit (COA).

"When I said ‘Ang abogadong walang alam, what I meant was, in Congress, he repeatedly said he knew totally nothing about the use and liquidation of the confidential funds. But nonetheless, if I offended you in any way sir, I’m very sorry for that, that’s not my intention", paglilinaw ni Tolosa.

Sa huli ay nagruling si presiding officer Chiz Escudero na alisin sa record ng paglilitis ang nasabing pahayag.

Pinaalalahanan din ni Escudero ang mga counsels ng dalawang panig na huwag gumamit ng mga ganitong salita sa kapwa abogado.