Pope Leo, nanawagan ng AI na nagsusulong sa ‘dignidad ng bawat tao’

ROME — Hinimok ni Pope Leo noong Lunes ang pagbuo ng mga artificial intelligence (AI) system na hindi magpapalalim ng pagkakahati-hati sa lipunan kundi magpapalakas sa mga pagsisikap para sa kapayapaan. Nagbabala ang Santo Papa sa panganib na maaaring itulak ng AI ang mundo tungo sa walang katapusang digmaan.

“Sa mundong minamarkahan ng tunggalian at pagkakahati-hati, ang pagbuo ng artificial intelligence ay nangangailangan ng pananaw na ginagabayan ng karunungan at pag-ibig sa kapwa (In a world marked by conflict and division, the development of artificial intelligence calls for a vision inspired by wisdom and charity),” sinabi ng pontiff sa isang mensahe para sa isang kumperensya tungkol sa AI na ginanap sa Rome.

Nanawagan ang papa para sa pagbuo ng mga AI system na “naglilingkod sa dignidad ng bawat tao at nagpapalakas sa mga ugnayang nagbubuklod sa sangkatauhan.”

Si Leo, ang unang papa na isinilang sa Estados Unidos, ay ginawang pangunahing tema ng kanyang 16-buwang pagka-papa ang pagtugon sa mga posibleng panganib ng pag-unlad ng AI. Una niyang tinalakay sa publiko ang isyu tatlong araw matapos siyang mahalal bilang papa.

Sa kanyang unang pangunahing dokumento na inilabas noong Mayo, nagbabala si Leo na nagpapalaganap ng maling impormasyon ang mga AI system at nagbibigay-priyoridad sa tunggalian. Hinimok din niya ang pagkakaroon ng pandaigdigang regulasyon sa industriya.

Ginanap ang kumperensya noong Lunes sa Pontifical Lateran University sa Rome at pinamagatang “AI4Peace.” Kabilang sa mga tagapagsalita sina Amerikanong ekonomista Jeffrey Sachs, Rome city council president Svetlana Celli, at Francisco Rojas Aravena, rector ng UN University for Peace na nakabase sa Costa Rica.

Binasa sa mga dumalo ni Rev. Andrea Ciucci, chancellor ng Pontifical Academy for Life ng Vatican, ang maikling mensahe ni Leo.