Pilipinas, European Union nakamit ang kasunduan sa malayang kalakalan

BRUSSELS — Naabot na ng European Union (EU) at Pilipinas ang isang paunang kasunduan sa malayang kalakalan bilang bahagi ng mas malawak na pagtutok ng EU sa Asya, sinabi noong Martes ni European Commissioner for Trade and Economic Security Maros Sefcovic.

“Napagkasunduan na ang mga pangunahing parametro, inaprubahan na ito sa antas pulitikal, at ngayon ay kailangan nating isalin ang mga numerong ito at ang mahahalagang kasunduang ito sa legal na teksto (The key parameters are there, they are approved by the political level and now what it means is that we have to translate these numbers, these key agreements into the legal text),” sinabi ni Sefcovic sa mga mamamahayag.

Ayon sa European Commission, ang paunang “substantial agreement” ay hahantong sa isang ganap na kasunduan sa mga darating na buwan.

Ang kasunduan sa Pilipinas ay bahagi ng pagtuon ng EU sa Asya, partikular sa Southeast Asia, upang makahanap ng mga bagong merkado para sa mga produkto at serbisyo nito at mga lugar na paglalaanan ng puhunan, bilang hakbang upang mabawasan ang epekto ng mga taripa ni US President Donald Trump.

Nakamit na ng EU ang mga kasunduan sa kalakalan sa Vietnam at Indonesia at nakikipag-usap naman sa Malaysia at Thailand. Ayon kay Sefcovic, mas malayo na ang narating ng negosasyon sa Thailand.

Sa ilalim ng kasunduan sa Pilipinas, aalisin ang mahigit 94% ng mga taripa sa magkabilang panig, na makikinabang ang mga produktong industriyal mula sa EU gaya ng makinarya, appliances at kagamitang pangtransportasyon, gayundin ang mga produktong agrifood gaya ng karne, dairy at mga inuming de-alkohol.

May puwang pang lumago ang bilateral trade na higit pa sa kasalukuyang €17.6 bilyong halaga ng kalakalan sa mga produkto at €10.3 bilyon sa mga serbisyo, ayon sa European Commission.

($1 = €0.8725)