Forensic experts: pagkakakilanlan ng mga biktima mula sa nasunog na ferry sa Palawan, maaaring abutin ng ilang buwan

CORON — Maaaring abutin ng ilang linggo o buwan bago makilala ang mga biktima ng sunog sa isang ferry sa Pilipinas na ikinasawi ng 76 katao, ayon sa mga awtoridad nitong Linggo.

Sinimulan na ng mga forensic expert ang pangangalap at paghahambing ng mga DNA sample mula sa mga sunog at nasunog na labi, habang patuloy namang inaalam ng mga imbestigador ang sanhi ng isa sa pinakamalalang aksidenteng pandagat sa bansa nitong mga nakaraang taon.

Ayon kay Richard Allan Mangalip, forensic specialist ng Philippine National Police (PNP), may ilang labi na magkakalapit na natagpuan sa ilang bahagi ng barko, habang ang iba naman ay nakakalat sa iba't ibang bahagi nito. Mahigit 130 katao ang sakay ng ferry na papalapit na sana sa destinasyon nang sumiklab ang sunog.

Mula Maynila patungong Coron, Palawan ang biyahe ng ferry, na karaniwang tumatagal nang humigit-kumulang 20 oras.

“Karamihan sa kanila ay sunog na sunog na ang kalagayan (Most of them are already in a charred condition),” ani Mangalip sa isang press conference.

Sinabi niyang hindi pa makapagbigay ang mga awtoridad ng tiyak na panahon kung kailan matatapos ang pagkakakilanlan sa mga biktima dahil sa dami ng specimen na kailangang suriin.

“Maaaring ilang linggo, o maaaring mas matagal pa ("It could be weeks, or it could be much longer),” dagdag niya.

Ito ay isang araw matapos makarekober ang mga rescue team ng 41 karagdagang labi mula sa ferry, dahilan upang umakyat sa 76 ang bilang ng mga nasawi. Labintatlo naman ang patuloy na hinahanap.

Sinabi ng mga opisyal na posibleng may iba pang labi na matagpuan dahil hindi pa lubusang nasusuyod ng mga imbestigador ang mga bahaging binaha sa loob ng barko.

Unang nakapasok ang mga bumbero sa ferry noong Biyernes, matapos maapula ang apoy makalipas ang mahigit isang araw mula nang sumiklab ito.

Ipinakita sa mga larawang inilabas ng Philippine Coast Guard ang lawak ng pinsala sa loob ng barko, kung saan makikitang baluktot dahil sa matinding init ang magkakasunod na bakal na frame ng mga higaan at nababalutan ng abo.

Sinabi ng mga imbestigador na hindi pa nila natutukoy kung saan nagsimula ang sunog at patuloy pa nilang sinusubukang pasukin ang mahahalagang bahagi ng barko, kabilang ang mga binahang lower deck at engine room. Maaaring makatulong ang mga ebidensiyang makukuha sa mga lugar na ito upang matukoy ang sanhi ng sunog.

Sa isang pahayag ng Maritime Industry Authority (MARINA), batay sa mga salaysay ng mga nakaligtas, dalawang pagsabog umano ang narinig sa loob ng barko bago sumiklab ang apoy.

Sinabi naman ng kinatawan ng may-ari ng barko na Atienza Inter-Island Ferries sa parehong press conference na lubos na nakikipagtulungan ang kumpanya sa mga imbestigador at magpapatuloy ito sa pagtulong sa mga pamilyang naapektuhan ng insidente.

Ang sunog ay pinakahuli sa serye ng mga nakamamatay na aksidenteng pandagat sa Pilipinas, isang kapuluan na binubuo ng mahigit 7,600 isla, kung saan milyon-milyong Pilipino ang umaasa sa mga ferry at maliliit na sasakyang-dagat para sa kanilang paglalakbay.