Boxing icon na si Manny Pacquiao, sasabak sa laban ng Pilipinas kontra kahirapan

MANILA — Ilang dekada ring nagpapakawala ng suntok sa boxing ring ang boxing great na si Manny Pacquiao. Ngunit simula Martes, ilalaan ng Filipino sports icon ang kanyang laban sa isang mas matagal nang kalaban: ang kahirapan.

Sumali si Pacquiao sa Gabinete ni Pangulong Ferdinand Marcos Jr. noong Martes bilang pinuno ng ahensiya ng pamahalaan laban sa kahirapan, at nangakong tutulong sa mga Pilipinong dumaranas ng mga pagsubok na pamilyar sa kanya.

Itinalaga ang 47-anyos na dating senador bilang lead convener ng National Anti-Poverty Commission (NAPC), ang kanyang unang posisyon sa Gabinete matapos ang mahabang karera sa pulitika na kinabibilangan ng paglilingkod sa Kongreso at Senado, hindi matagumpay na pagtakbo sa pagkapangulo noong 2022, at pagkabigo sa pagtatangkang makabalik sa Senado noong 2025 bilang bahagi ng ticket na sinuportahan ng administrasyong Marcos.

Bilang pinuno ng NAPC, pangungunahan ni Pacquiao ang koordinasyon ng mga hakbang ng pamahalaan upang mabawasan ang kahirapan, na aniya ay lubos niyang nauunawaan dahil naranasan niya ito mismo.

“Nanggaling ako sa kahirapan. Naranasan kong matulog sa karton sa mga lansangan, tubig lang ang iniinom, walang makain, at nag-iipon ng mga baryang napupulot para lamang makatulong sa aking pamilya,” ani Pacquiao sa isang pahayag.

Lumaki si Pacquiao sa hirap. Noong kanyang kabataan, naging stowaway o nagtatago siya sa mga barko at nakipaglaban sa mga lansangan, na kumikita ng $2 sa bawat laban. Ayon sa isang artikulo ng Sports Illustrated, umabot sa $220 milyon ang kanyang net worth noong nakaraang taon.

Pamumunuan ni Pacquiao ang ahensiya kung saan layunin ng administrasyong Marcos na ibaba ang poverty incidence sa 8 hanggang 9 porsiyento pagsapit ng 2028. Batay sa datos ng pamahalaan, bumaba sa 9.7 porsiyento ang poverty rate noong 2025, katumbas ng tinatayang 11.08 milyong Pilipinong na nasa poverty line.

Si Pacquiao ang tanging boksingero na nagwagi ng world titles sa walong weight divisions at nananatiling isa sa mga pinakaginagalang na personalidad sa palakasan sa Pilipinas. Ang kanyang pinakamalalaking laban ay dinudumog ng lahat—mula sa mga pangulo at Hollywood stars hanggang sa mga ordinaryong Pilipino—na kadalasan ay tila nagpapahinto sa takbo ng buong bansa na may 119 milyong populasyon.

Nagretiro si Pacquiao noong 2021 ngunit bumalik sa boxing ring noong Hulyo 2025 upang harapin si Mario Barrios para sa WBC welterweight championship noong Hulyo 19 sa Las Vegas. Naiuloklok din siya sa International Boxing Hall of Fame noong 2025.