Arrest warrant laban kay VP Sara Duterte, inilabas ng korte sa QC

QUEZON CITY — Naglabas ng warrant of arrest ang  Quezon City Regional Trial Court laban kay Vice President Sara Duterte kaugnay ng kasong grave threats, na umano’y ginawa niya laban kay Pangulong Ferdinand R. Marcos Jr. at sa kanyang pamilya.

Sa isang pahayag nitong Biyernes, Setyembre 4, 2026, sinabi ng abogado ni Duterte na si Atty. Paul Lawrence Lim na nakahanda ang bise presidente na harapin ang utos ng korte, habang ginagawa ang lahat ng legal na hakbang na maaari niyang gamitin.

“Anuman ang usapin tungkol sa hurisdiksyon, wala siyang intensyong takasan ang batas at patuloy niyang gagamitin ang lahat ng maaaring legal remedies,” ani Lim. (“Regardless of the question on jurisdiction, she has no intention of evading the law and will continue to exercise all her legal remedies.”)

Usapin sa hurisdiksyon at depensa sa impeachment

Nauna nang naghain ang legal team ng bise presidente ng mosyon para ipawalang-bisa at ibasura ang criminal charges laban sa kanya, dahil iginiit nilang walang hurisdiksyon ang korte sa isang nakaupong impeachable official.

 “Sa aming pananaw, ang ating bise presidente ay isang impeachable officer. Sa ilalim ng konstitusyon, may mga opisyal na maaari lamang matanggal sa kanilang posisyon sa pamamagitan ng impeachment,” naunang pahayag ni Lim. (“In our view, the Vice President is an impeachable officer. Under the Constitution, there are officials who can only be removed from office through impeachment.”)

Dagdag pa niya, hindi dapat isailalim sa aktibong criminal prosecution ang isang impeachable official habang nanunungkulan ito.

“Dahil sila ay impeachable officer, hindi dapat sila kinakakasuhan ng kasong kriminal katulad ng sinampa sa ating bise presidente,” sabi ng abogado. (“Because they are impeachable officers, they should not be facing criminal charges such as the one filed against our Vice President.”)

Ang criminal case ay isinampa ng Department of Justice (DOJ) kasunod ng reklamo ng National Bureau of Investigation (NBI). Nag-ugat ito sa mga pahayag ni Duterte sa isang online press briefing noong Nobyembre 2024.

Sa nasabing briefing, sinabi ni Duterte na kumuha siya ng isang assassin upang patayin sina President Marcos Jr., First Lady Liza Araneta-Marcos at noo’y House Speaker Martin Romualdez sakaling siya mismo ay mapatay.

Mula noon, iginiit ni Duterte na kinuha nang wala sa konteksto ang kanyang mga pahayag.

Kasabay na impeachment trial sa Senado

Ang kasong grave threats ay bahagi rin ng Article IV ng impeachment complaint laban kay Duterte na kasalukuyang nililitis sa Senate impeachment court.

Bukod sa umano’y death threats, nahaharap din ang Bise Presidente sa iba pang impeachment charges kaugnay ng umano’y maling paggamit ng confidential funds, bribery at hindi maipaliwanag na yaman.

Inirekomenda ng mga prosecutor sa korte ang ₱120,000 na piyansa para sa pansamantalang kalayaan ni Duterte sakaling piliin niyang magpiyansa habang nagpapatuloy ang criminal case.