Ukraine: North Korea naghahanda umanong magpadala ng dagdag na 10,000 sundalo sa Russia

MANILA — Sinabi ni Ukrainian President Volodymyr Zelenskiy nitong Lunes na mahigit 8,000 sundalong North Korean ang nasa teritoryo ng Russia at naghahanda umano ang Pyongyang na magpadala pa ng 10,000 sundalo.

Batay sa tinawag niyang “bagong datos” tungkol sa pagpapadala ng mga sundalong North Korean sa Russia, sinabi ni Zelenskiy sa isang post sa X na “pinipili sila para sa pagsasanay at kasunod na pagpapadala sa Russia.”

Sinabi ng Ukrainian president noong Agosto na maaaring magpadala ang North Korea ng hanggang 50,000 sundalo upang lumaban para sa Russia, at hinimok ang South Korea na magbigay ng suporta sa air defense ng Ukraine.

Noong Hulyo, inanunsyo ng South Korea ang $100 milyong tulong para sa Ukraine, ngunit hindi kabilang dito ang mga nakamamatay na armas.

Ang pahayag ni Zelenskiy nitong Lunes ay kasunod ng hindi pagkakaunawaan ng Seoul at Kyiv tungkol sa kanyang anunsyo noong nakaraang linggo na inilipat ng Ukraine sa South Korea ang dalawang nahuling sundalong North Korean.

Ipinahayag ng Seoul ang pagkadismaya sa anunsyo ni Zelenskiy, at sinabing may kasunduan na panatilihing confidential ang paglilipat sa dalawang sundalo.

Nagprotesta rin ang South Korea laban sa tinawag nitong maling pahayag ng tanggapan ng Ukrainian president na walang naturang kasunduan para panatilihing confidential ang paglilipat.

Tinatayang 14,000 hanggang 15,000 sundalo ang ipinadala ng North Korea upang suportahan ang digmaan ng Russia sa Ukraine mula noong 2024, ayon sa mga pagtataya ng Ukraine at South Korea.

Karamihan sa mga ito ay ipinadala sa rehiyon ng Kursk upang tumulong na itaboy ang paglusob ng Ukraine.

Nagbigay rin umano ang Pyongyang sa Russia ng milyun-milyong bala para sa artilerya at mortar, gayundin ng mga ballistic missile, long-range artillery system at multiple-launch rocket system, ayon sa mga pagtataya ng Ukraine at mga independiyenteng pagsusuri.