Super Typhoon Champi, inaasahang papasok sa Philippine Area of Responsibility sa Oktubre 20

Tinatayang nasa 2,090 kilometro silangan ng timog-silangang bahagi ng Luzon ang sentro ng mata ng Super Typhoon #Champi, batay sa datos ng DOST-PAGASA sa inilabas nitong update alas-10:00 ng umaga nitong Linggo (Oktubre 18, 2026).

Inaasahang kikilos ang bagyo sa direksiyong kanluran-hilagang-kanluran at papasok sa Philippine Area of Responsibility (PAR) sa umaga o hapon ng Martes (Oktubre 20). Sa oras na makapasok ito sa PAR, bibigyan ang bagyo ng lokal na pangalang Rosal.

Matapos maabot ang pinakamataas na lakas nito, posibleng magsimula ang unti-unting paghina ng bagyo sa araw ring iyon.

Samantala, posibleng magtaas ng mga Tropical Cyclone Wind Signal sa hilaga at silangang bahagi ng Northern Luzon at ilang bahagi ng Bicol Region simula pa lamang sa gabi ng Lunes (Oktubre 19) o umaga ng Martes bilang paghahanda sa inaasahang malalakas o mas matitinding hangin na dulot ng bagyo.