Raid sa gay bar sa Taipei, nagdulot ng galit at protesta

TAIPEI — Tinatayang 100 miyembro ng LGBTQ+ community sa Taipei ang nagprotesta noong Linggo matapos salakayin ng pulisya ang isang gay bar isang araw bago nito at dalhin sa kustodiya ang mga customer. Bihira ang ganitong operasyon sa Taiwan, na ipinagmamalaki ang liberal nitong imahe at legal na proteksyon para sa mga sexual minority.

Ipinasa ng Taiwan ang batas na kumikilala sa same-sex marriage noong 2019, na naging unang bansa sa Asya na gumawa nito. Karaniwang itinuturing ang Taiwan bilang isa sa mga bansang may mataas na antas ng tolerance sa rehiyon kung saan madalas na pinipigilan o ipinagbabawal ang karapatan ng LGBTQ+.

Gaganapin sa Taipei sa huling bahagi ng buwang ito ang pangunahing Pride event ng lungsod, na pinakamalaki sa East Asia.

Sinalakay ng pulisya ang gay bar na Commander D sa Wanhua district ng Taipei noong Sabado ng hapon. Dinala sa presinto ang 51 katao para sa pagtatanong at inaresto ang may-ari ng bar. Hindi siya nakontak agad ng Reuters para sa kaniyang panig.

Sinabi ni Chen Yu-cheng, tagapagsalita ng presinto, sa Reuters na isinagawa ng pulisya ang operasyon batay sa search warrant kaugnay ng hinihinalang paglabag sa batas laban sa "offenses against public morality."

Ayon kay Chen, pinaghihinalaang lumabag ang 51 katao sa batas na nagbabawal sa "hayagang pagpapakita ng hubad na katawan o pagpapakita ng malalaswang postura sa pampublikong lugar o lugar na bukas sa publiko (wantonly exposing one's naked body or presenting a lascivious posture in a public place or publicly accessible place)."

Mapayapa ngunit maingay na nagmartsa ang mga nagprotesta patungo sa police station ng presinto noong Linggo ng hapon.

"Marahas nilang sinalakay ang lugar. Nakakatakot talaga (They raided the place violently. It was very scary)," sinabi sa Reuters ng isa sa mga dinala sa presinto, na nagpakilalang Wen lamang.

Tumanggi ang pamahalaang lungsod ng Taipei na magbigay agad ng komento.

Si Mayor Chiang Wan-an, mula sa pangunahing opposition party na Kuomintang at haharap sa halalan sa susunod na buwan, ay dati nang dumalo sa Taipei Pride at nagpahayag ng suporta sa LGBTQ+ community.

Lumabas din sandali ang hepe ng presinto, na hindi nagpakilala, upang makipag-usap sa mga nagprotesta.

"Ni-rerespeto namin ang kultura ng isang pluralistic society at poprotektahan namin ang karapatan ng bawat mamamayan (We respect the culture of a pluralistic society and will protect the rights of every citizen)," sinabi niya habang sumisigaw ng pagtutol ang mga nagprotesta.

Sinabi ng nagprotestang si Kang Yang na galit siya sa isinagawang raid, lalo na dahil nangyari ito ngayong Pride month. "Hindi ako sang-ayon dito (I'm not cool with this)," aniya. "Dati, ipinagmamalaki ng lungsod na ito na queer-friendly ito (This city used to claim that it was queer friendly)."

Sumailalim ang Taiwan sa martial law hanggang 1987 at itinuturing na malaking taboo noon ang same-sex relations.