Pope Leo, patuloy sa karaniwang schedule habang naghahanda para sa operasyon sa baga

Ipinagpapatuloy ni Pope Leo ang kanyang regular na iskedyul nitong Lunes habang naghihintay ng operasyon para alisin ang isang maliit na bukol na natuklasan sa isa sa kanyang mga baga, ayon sa Vatican.

Sinabi ni Leo, 71, nitong Linggo na natuklasan ang maliit na bukol o nodule sa kanyang baga sa isang medical checkup kamakailan. Ayon sa kanya, ito ay “well-contained” o nananatili sa isang limitadong bahagi, at maagang natukoy.

Kinumpirma ng tanggapan ng Vatican press nitong Lunes na natuklasan ang bukol sa isang regular na pagsusuri sa kalusugan.

Nahalal si Leo bilang papa ng mga kardinal ng Simbahang Katolika noong Mayo 2025. Itinuturing siyang medyo bata para sa isang pinuno ng Simbahan. Mahilig siya sa sports, kabilang ang tennis, at wala siyang kilalang bisyo sa paninigarilyo o naitalang mga naunang problema sa kalusugan.

Sinabi ng papa nitong Linggo na sasailalim siya sa operasyon ngayong linggo. Gayunman, hindi pa tinutukoy ng Vatican kung anong araw ito isasagawa. Inaasahang aabutin ng humigit-kumulang isang linggo ang kanyang pagpapagaling.

Sa kabila ng kanyang nakatakdang operasyon, nananatiling abala ang schedule ni Leo bilang pinuno ng Simbahang Katolika na may 1.4 bilyong miyembro sa buong mundo. Kabilang sa kanyang mga nakatakdang pampublikong gawain ngayong linggo ang isang misa sa St. Peter’s Square sa Miyerkules ng umaga.

Sa tala nitong Lunes ng umaga, hindi pa kinakansela ang misa sa Miyerkules.

Ang lung nodule ay isang maliit at lokal na sugat o bukol sa baga na maaaring hindi cancerous. Ayon sa American Thoracic Society, mas mababa sa limang porsiyento ng lahat ng lung nodule ang napag-alamang cancerous. Gayunman, tumataas ang panganib depende sa edad, laki ng bukol, paninigarilyo, at iba pang salik.