Pope Leo, muling tiniyak ang pangakong wakasan ang pang-aabuso sa mga bata ng mga paring Katoliko

LOURDES, France – Muling tiniyak ni Pope Leo ang kanyang pangako na wakasan ang pang-aabuso sa mga bata ng mga paring Katoliko sa isang pagpupulong noong Linggo kasama ang mga survivor ng pang-aabuso sa France, ayon sa Vatican. Ilang oras bago nito, hinimok ng Santo Papa ang Simbahang Katolika na aminin ang mga pagkukulang nito at pagalingin ang “malalalim nitong sugat.”

Sa dalawang oras na pagpupulong kasama ang pitong survivor sa France, kung saan nagsasagawa si Leo ng apat na araw na pagbisita sa tatlong lungsod, pribado niyang kinausap ang bawat isa at pinakinggan ang kanilang mga mungkahi kung paano mapapabuti ang mga hakbang ng Simbahan para sa proteksyon ng mga bata, ayon sa pahayag ng Vatican.

“Pinasalamatan niya sila sa kanilang masakit na mga salaysay at muling tiniyak ang kanyang pangako na matiyak na hindi na mauulit sa iba ang pinsalang kanilang dinanas (He thanked them for their painful testimony and reaffirmed his commitment to ensuring that the harm they experienced is not repeated for others),” ayon sa pahayag.

Sinabi ng mga survivor matapos ang pagpupulong na naging emosyonal at makabuluhan ito. Anila, nadama nilang pinakinggan sila ng Santo Papa at humanga sila sa kanyang malasakit at kaalaman sa kani-kanilang kaso, ngunit umaasa rin silang susundan ng konkretong aksyon ang kanyang mga sinabi.

“Talagang naniniwala siya na marami nang nagawa ang Simbahan sa France, pero naniniwala rin siyang napakarami pang kailangang gawin ng Simbahan sa France (He certainly believes that the Church has done a great deal in France, but he also believes that the Church in France still has a tremendous amount left to do),” ani Jérôme Guillement.

Nagsasagawa si Leo ng apat na araw na pagbisita sa France. Umaasa ang mga lider ng Simbahang Katolika sa bansa na makatutulong siya sa pagpapanumbalik ng tiwala sa Simbahan matapos lumabas sa isang ulat noong 2021 na tinatayang 330,000 batang French ang inabuso ng mga pari at lay leader ng Simbahan sa loob ng pitong dekada.

Sinabi ng Santo Papa sa tinatayang 150,000 kataong dumalo sa isang misa sa isang malawak na lugar malapit sa tanyag na dambanang Katoliko sa Lourdes noong Linggo na kailangang magkaroon ng lakas ng loob ang Simbahan na harapin ang nakaraan nito.

“Upang pagalingin ang malalalim na sugat, pagtataksil at masasakit na pagkakamaling naganap sa loob (ng Simbahan), kailangan nating buong pagpapakumbabang ilagay ang ating sarili sa ilalim ng mapanuring tingin ng Panginoon (In order to heal the deep wounds, infidelities and painful errors that have occurred within (the Church), we must humbly place ourselves under the Lord's purifying gaze),” sabi ng kauna-unahang Amerikanong Santo Papa.

Sinabi ni Véronique Garnier, isa sa mga survivor na nakipagpulong kay Leo, na nakabahala sa kanya ang misa kung saan binanggit ni Leo ang pang-aabuso ngunit hindi direktang humingi ng tawad para rito. Dahil dito, napaisip siya kung bakit pa siya dumalo.

Gayunman, sinabi niyang nabuhayan siya ng pag-asa matapos makausap si Leo.

“Talagang naniniwala akong may pag-asa—pag-asang maaaring magkaroon ng pagbabago at tunay na pakikinig sa amin nang malalim, sa halip na mababaw na pakikinig lamang na may magagandang salita na hindi naman sinusundan ng tunay na aksyon (I do indeed believe there is hope — hope that there can be change and truly listening to us at a deep level, rather than just superficially with beautiful words that are never followed by any real action),” aniya.

Tinalakay rin ni Leo ang mga iskandalo ng pang-aabuso sa isang closed-door meeting kasama ang mga obispo ng France noong Linggo, ayon sa tekstong ibinigay ng Vatican.

Pinasalamatan ng Santo Papa ang mga obispo sa “matapang na mga hakbang” na aniya ay ginawa nila upang harapin ang mga iskandalo at hinimok silang palakasin pa ang kanilang mga hakbang para sa proteksyon ng mga bata at “ipagpatuloy ang nasimulang landas, habang pinananatili ang pinakamataas na antas ng pagbabantay.”

Dinumog ng malalaking bilang ng tao ang pagbisita ni Leo sa France. Tinatayang 800,000 katao ang dumalo sa outdoor Mass kasama ang Santo Papa sa Champs-Élysées sa Paris noong Sabado. Muli rin niyang hinimok ang lahat na pag-isipang muli ang pagpapaunlad ng artificial intelligence.

‘HINDI MAAARING IPAGSARA ANG ISYUNG ITO’

Dati nang direktang humingi ng tawad si Leo kaugnay ng mga iskandalo ng pang-aabuso na nakaapekto sa kredibilidad ng Simbahan sa buong mundo. Sa pagbisita niya sa Spain noong Hunyo, sinabi niya sa mga obispo doon na dapat nilang pakinggan ang mga survivor at magbigay sa kanila ng kaukulang reparasyon o danyos.

Sinabi ni Bishop Pierre-Antoine Bozo, tagapagsalita ng mga obispo ng France, na ang kagustuhan ng Santo Papa na makipagpulong sa mga survivor ay “nagpapakita na hindi natin maaaring ipagsara ang isyung ito at dapat itong palaging kabilang sa ating mga alalahanin.”

Kasama sa itineraryo ng Santo Papa sa France ang anim na aktibidad sa Lourdes, isang bayan sa paanan ng kabundukan ng Pyrenees na dinarayo ng tinatayang 3 milyong pilgrim bawat taon upang bisitahin ang dambana ng Birheng Maria at ang mga bukal na pinaniniwalaang may kakayahang magpagaling.

Ang lugar ay konektado rin sa isang iskandalong ilang taon nang kinakaharap ng Vatican. Sa harapan ng dambana ay may serye ng mga mosaic na gawa ni Rev. Marko Rupnik, isang kilalang religious artist na may ugnayan sa Vatican at inakusahan ng seksuwal na pang-aabuso.

Mahigit 20 babae ang nag-akusa kay Rupnik, ngunit wala siyang nalalamang pampublikong pahayag tungkol sa mga paratang. Limang sinasabing biktima niya ang nagpadala ng bukas na liham sa Santo Papa noong Huwebes kung saan mariin nilang pinuna ang nagpapatuloy na paglilitis ng Vatican sa pari.

Ang mga mosaic na kasingtaas ng gusali ay tinakpan ng malalaking mapusyaw na dilaw na trapal para sa pagbisita ng Santo Papa. Pagdating sa misa noong Linggo, sumakay si Leo sa kanyang open-top popemobile at dumaan malapit sa harapan ng dambana at sa mga natakpang mosaic.

Noong Biyernes, mariing muling ipinahayag ng Santo Papa ang pagtutol ng Simbahang Katolika sa mga hakbang para sa assisted dying, dalawang buwan matapos lumikha ang France ng legal na karapatang mamatay para sa mga taong may mga sakit na walang lunas. Muli rin niyang binanggit sa Lourdes ang paninindigan ng Simbahan sa pagtatanggol sa buhay.

Sa pakikipagpulong sa mga volunteer na tumutulong sa mga maysakit na pilgrim na umaasang makatatanggap ng himala mula sa tubig ng dambana, hinimok ni Leo ang mga ito na alalahanin ang “malalim na kahulugan” ng pangangalagang pangkalusugan.

“Iyon ay ang pangangalaga sa isang taong naghihirap, hindi ang pag-aalis sa taong iyon (That is to care for a suffering person, not to eliminate that person),” sabi ng Santo Papa. “Hindi dapat kailanman maging kasangkapan ng planadong kamatayan ang medisina! (Medicine must never become the servant of programmed death!)”