PNP gagamit ng AI, best practices sa mundo para mapahusay ang pagtugon sa hostage crisis

Inihayag ng Philippine National Police (PNP) nitong Martes ang mga bagong hakbang upang palakasin ang pagtugon nito sa mga insidente ng hostage-taking at iba pang high-risk emergency sa pamamagitan ng paggamit ng teknolohiya at mga subok nang pamamaraan mula sa ibang bansa sa crisis response system ng pulisya.

Sinabi ni PNP chief Gen. Jose Melencio Nartatez Jr. na kailangang patuloy na pagbutihin ng police force ang pagtugon sa mga sitwasyong nangangailangan ng maingat na negosasyon, tamang pagpapasya at koordinadong pagkilos dahil sa nagbabagong security environment.

“Ang bawat hostage situation ay karera laban sa oras kung saan nakataya ang mga buhay. Kailangan nating bigyan ang ating mga tauhan ng tamang kasanayan, teknolohiya at kaalaman upang makagawa ng wastong desisyon sa mga sandaling mahalaga ang bawat segundo (Every hostage situation is a race against time where lives are at stake. We must equip our personnel with the right skills, the right technology, and the right knowledge to make sound decisions when every second counts),” ani Nartatez sa isang pahayag.

“Sa ngayon, sinusuri natin kung paano makatutulong ang teknolohiya, kabilang ang artificial intelligence, upang mapahusay ang ating mga pamamaraan sa crisis response. Patuloy din tayong matututo mula sa mga global best practices upang matiyak na handang tumugon ang ating mga pulis nang maagap at responsable sa anumang krisis (At present, we are exploring how technology, including artificial intelligence, can help us advance our crisis response techniques. We will also continue to learn from global best practices to ensure that our police are ready to respond decisively and responsibly to any crisis).”

Inatasan ni Nartatez ang Anti-Kidnapping Group (AKG) na magsagawa ng regular na briefing para sa mga lokal na tanggapan ng pulisya upang matiyak na pare-pareho ang mga operational standard sa buong bansa.

Kamakailan, nagsagawa ang AKG ng Hostage Negotiation Course para sa mga tauhan nito at mga kalahok na unit. Nakatuon ang pagsasanay sa pagpapalawak ng kaalaman, kasanayan at kahandaan sa operasyon sa paghawak ng mga insidente ng hostage-taking at iba pang kritikal na sitwasyon.

Tinalakay sa kurso ang epektibong negosasyon, crisis management at mga estratehiya sa tamang pagpapasya. Mahalaga ang mga kasanayang ito sa mga insidenteng kailangang maingat na timbangin ang police action upang maprotektahan ang mga buhay habang tinatapos ang krisis.

“Sa gitna ng nagbabagong security landscape, nakatuon ang PNP sa pagpapalakas ng kakayahan nito sa operasyon upang tumugon sa mga hostage situation. Walang maiiwan. Ipapasa natin sa ating mga tauhan sa ground ang mga natutuhan sa Hostage Negotiation Course upang makatugon sila nang naaangkop sa panahon ng krisis (Amid the evolving security landscape, the PNP is committed to improving its operational capabilities in responding to hostage situations. No one will be left behind. We will cascade the learnings from the Hostage Negotiation Course to our personnel on the ground so they can respond appropriately during crisis situations),” dagdag ni Nartatez.