North Korea: Pinakahuling missile test, idinisenyo para bigyan ang kaaway ng ‘walang lunas na sakit ng ulo’

SEOUL — Sinabi ng North Korea na matagumpay nitong sinubukan noong Linggo ang isang bagong sandata na nagpapakita umano ng ultramodernong teknolohiya sa depensa o ultra-modern defence technology sa isang paglulunsad na pinangasiwaan ni lider Kim Jong Un, ayon sa ulat ng state media noong Martes.

Pinuri ni Kim ang pag-unlad sa pagpapalakas ng kahandaan ng bansa sa digmaan. Sinabi niya na ipinakita ng pagsubok, na isinagawa ng North Korea’s Missile Administration, ang malaking pag-unlad sa kakayahan ng sandatahang lakas ng bansa na makipaglaban at “mas mauunawaan ng kaaway kung ano ang ibig sabihin ng naturang pag-unlad nang hindi na kailangan ng anumang paliwanag (the enemy will know better what such progress means without any explanation).”

Sinabi umano ni Kim na ang ganitong kalagayan ay magdudulot sa kaaway ng “walang lunas na sakit ng ulo at napakalupit at hindi maiiwasang dagok (He affirmed that such reality would give the enemy an incurable headache and a very cruel and unavoidable blow).”

Hindi tinukoy sa ulat ng KCNA kung anong uri ng sandata ang sinubukan.

Sa mga larawang inilabas ng KCNA, makikita si Kim, kasama ang kanyang anak na dalagitang babae, habang sinusuri ang isang screen na nagpapakita ng mapa ng silangang baybayin ng bansa at ang “flight trajectory” ng Hwasongpho-11-ma-1, na malamang na bahagi ng serye ng short-range ballistic missiles na ina-upgrade ng Pyongyang.

Ayon sa NK News, isang website na nakabase sa Seoul na nakatuon sa mga balita tungkol sa North Korea, lumilitaw na ang projectile ay isang upgraded na bersyon ng missile na nilagyan ng hypersonic glide vehicle.

Ang paglalagay ng glide vehicle sa isang missile ay nagbibigay-daan sa warhead na makapagmaniobra upang makaiwas sa mga depensang kontra-missile at maaari rin umanong mailunsad nang bahagyang papunta sa orbit.

Ang mga hypersonic missile ay kabilang sa mga sandatang ipinag-utos ni Kim na paunlarin bilang bahagi ng pagpapahusay sa kakayahang nukleyar ng bansa.

Sinabi naman ng militar ng South Korea noong Linggo na nagpaputok ang North Korea ng dalawang short-range ballistic missile sa karagatan sa silangang bahagi ng bansa.

Isinagawa ang pagsubok ilang araw matapos akusahan ng Pyongyang ang Estados Unidos na nagpapataas ng tensyon sa Korean Peninsula sa pamamagitan ng serye ng mga military drill.

Noong Lunes, nagkita ang mga foreign minister ng South Korea, Japan at United States sa sidelines ng United Nations General Assembly sa New York upang sumang-ayon na mahigpit na mag-ugnayan para sa kapayapaan, katatagan at denukleyarisasyon ng Korean Peninsula, ayon sa foreign ministry ng Seoul.