Mary Jane Veloso, pinagkalooban ni Marcos ng absolute pardon
Sandra Samala-Salem
September 25, 2026 at 10:52:10 AM
FILE PHOTO: Dumating sa Pilipinas si Mary Jane Veloso matapos ang halos 15 taong pagkakakulong sa Indonesia. Si Mary Jane Veloso, isang overseas Filipino worker (OFW), ay ibinalik sa Pilipinas mula Indonesia noong Disyembre 18, 2024, matapos ang halos 15 taong pagkakakulong dahil sa umano’y kasong drug trafficking at pagkakahatol sa kanya ng kamatayan sa pamamagitan ng firing squad. Pagdating sa Ninoy Aquino International Airport, inilipat siya sa Correctional Institution for Women sa Mandaluyong City, kung saan siya sinalubong ng kanyang pamilya at mga mahal sa buhay. Mananatili siya sa pasilidad habang hinihintay ang desisyon ni Pangulong Ferdinand Marcos Jr. sa hiling na clemency na inihain ng kanyang mga abogado at mga kapamilya. Makikita si Mary Jane Veloso na nakasuot ng itim kasama ang kanyang mga kapamilya.
xDeoxMontesclarosx via Reuters
Inanunsyo ni Pangulong Ferdinand R. Marcos Jr. nitong Biyernes ang pagkakaloob ng absolute pardon kay Mary Jane Veloso, na nakabalik sa Pilipinas noong Disyembre 2024 matapos makulong nang halos 15 taon sa Indonesia dahil sa kasong may kaugnayan sa umano’y drug trafficking.
“Pinirmahan ko na ‘yung pardon niya kahapon (I signed her pardon yesterday),” kumpirma ni Marcos sa sidelines ng kanyang pagbisita sa Eastern Visayas.
Sinabi ng Malacañang nitong Miyerkules na pinag-iisipan ni Marcos na pagkalooban si Veloso ng absolute pardon dahil sa humanitarian grounds.
Inaresto si Veloso noong 2010 sa Yogyakarta, Indonesia, at hinatulan ng kamatayan noong taong iyon matapos matagpuan ng mga awtoridad ang 2.6 kilo ng heroin sa kanyang bagahe.
Patuloy na iginiit ni Veloso ang kanyang pagiging inosente, at sinabing biktima siya ng human trafficking at nilinlang siya ng mga recruiter niya upang dalhin ang maleta nang hindi niya nalalaman ang laman nito.
Nakatanggap siya ng huling-minutong pagpapaliban sa pagpapatupad ng parusang kamatayan noong 2015 matapos hilingin ng pamahalaang Pilipinas sa Indonesia na huwag siyang bitayin upang makapagbigay siya ng testimonya laban sa umano’y mga trafficker niya.
Kasunod ng mga pag-uusap ng Pilipinas at Indonesia hinggil sa mga kasunduan para sa paglilipat ng mga bilanggo, nakabalik si Veloso sa Maynila noong 2024 at inilipat sa Correctional Institution for Women sa Mandaluyong City upang doon ipagpatuloy ang pagsisilbi ng natitira niyang sentensiya sa ilalim ng hurisdiksiyon ng Pilipinas.
Sinuri at pinag-aralan ng Office of the President ang apela ni Veloso para sa executive clemency noong unang bahagi ng taong ito.