Indian pilot, itinuring na bayani matapos iligtas ang mga pasahero sa pananaksak ng kasamang piloto

Pinuri ng mga lider ng Israel at India bilang bayani ang Indian pilot na si Smit Machchhar matapos niyang iligtas ang mga pasahero nang saksakin siya ng kanyang kasamang piloto sa umano'y tangkang pagpapabagsak ng isang eroplano ng flydubai noong Miyerkules.

Ligtas na nakarating sa Israel ang mga pasahero ng flight noong Miyerkules matapos mapigilan ng mga pasahero at crew ang tangkang pagpapabagsak ng eroplano ng co-pilot, ayon sa mga opisyal ng Israel. Nagsimula ang komprontasyon nang saksakin ng co-pilot ang piloto at bumulusok ang eroplano nang halos 14,000 talampakan (4,267 metro) sa loob lamang ng wala pang 30 segundo.

Nakahandusay at duguan si Machchhar sa sahig nang magawa niyang pindutin ang mekanismo para mabuksan ang pinto ng cockpit, ayon sa tagapagsalita ng tanggapan ni Israeli Prime Minister Benjamin Netanyahu sa Reuters. Dahil dito, napigilan ng mga pasahero at crew ang co-pilot at nakapuwesto ang dalawang iba pang piloto ng flydubai na sakay ng eroplano upang maipababa ito sa Tabuk, Saudi Arabia.

"Iniligtas niya ang buhay ng 174 na katao, kabilang ang mga mamamayan ng Israel at iba pang mga bansa (He saved the lives of 174 people, including Israeli citizens and other nationals)," sabi ni Netanyahu sa isang post sa X. “Ligtas na sa anumang panganib ang lahat ng pasahero (All passengers are out of harm's way),” nauna niyang sinabi sa isang video statement na inilabas ng kanyang tanggapan.

Sa isang post sa X nitong Huwebes ng madaling araw, pinuri naman ni Indian Prime Minister Narendra Modi si Machchhar at tinawag itong "bayani."

"Sa harap ng pinakamalaking panganib at sa kabila ng malubhang pagkakasugat, nagpakita siya ng matinding tapang at matibay na hangaring protektahan ang buhay ng iba. Nakatulong ang kanyang katapangan upang mailigtas ang daan-daang buhay at maiwasan ang isang malaking trahedya (In the face of the gravest danger and despite being seriously injured, he showed immense courage and an unwavering resolve to protect the lives of others. His valour helped save hundreds of lives and avert a great tragedy)," sabi ni Modi.

Sinabi ng mga awtoridad ng India sa Saudi Arabia na tumatanggap si Machchhar ng kinakailangang lunas sa isang ospital sa hilagang-kanlurang lungsod ng Tabuk at nakikipag-ugnayan sila sa kanyang pamilya at sa mga awtoridad ng Saudi upang maibigay ang lahat ng posibleng tulong.

Ayon sa Indian embassy sa Saudi Arabia sa isang post sa X, stable ang kondisyon ni Machchhar.

Si Machchhar, na nagmula sa Mumbai, India, ay sumailalim sa operasyon matapos ang insidente, ayon sa Indian newspaper na Hindustan Times.

Batay sa kanyang LinkedIn profile, mahigit 11 taon nagtrabaho si Machchhar sa Indian airline na SpiceJet bago sumali sa flydubai.

Hindi pa malinaw ang dahilan ng komprontasyon ng dalawang piloto. Sinabi ng flydubai sa isang pahayag na hindi pa alam ang mga ugat ng insidente at nagbabala laban sa "maagang pagbibigay ng haka-haka." Sinuspinde rin ng airline ang mga flight papunta at palabas ng Israel habang isinasagawa ang imbestigasyon.

Inilarawan ni Netanyahu ang insidente bilang "isang napakaseryosong insidente sa seguridad" at sinabi na iimbestigahan ng mga awtoridad ng Saudi ang co-pilot ng flydubai flight FZ1073, na bumiyahe mula United Arab Emirates patungong Israel.