Inarestong mamamahayag na si Philip Lustre, pinagkaitan ng due process—Prosecutor General

MAYNILA — Naniniwala si Prosecutor General Richard Anthony Fadullon na napagkaitan ng tamang proseso ang beteranong mamamahayag na si Philip Lustre nang ipadala sa maling address ang subpoena para sa kaniya. Inaresto si Lustre noong Sabado matapos dumalo sa isang news forum sa Quezon City.

Nahaharap sa kasong cyberlibel ang 71-anyos na mamamahayag, na isang matinding kritiko ng administrasyong Duterte.

“Sumasang-ayon ako sa kanila na hindi sila nabigyan ng nararapat na proseso dahil hindi sila nabigyan ng pagkakataong sumagot (I would have to agree with them that they were not given due process as they were not given the opportunity to answer),” sabi ni Fadullon sa isang media interview nitong Lunes.

Ayon sa abogado ni Lustre na si Dino de Leon, magkaiba ang address na nakasaad sa arrest warrant na inilabas ng isang korte sa Davao City at ang address na nakasaad sa subpoena.

“Naniniwala ako na may pagkukulang ang tagausig sa hindi pagtiyak kung bakit at paano natiyak na ang respondent ay nasa address na nakasaad sa dokumento (I believe that there was some omission on the part of the prosecutor by not validating why and how certain the respondent was on the address that was provided),” saad ni Fadullon.

“Dapat ay isinagawa rin ng tagausig ang tinatawag nating nararapat na pagsisiyasat. Dapat magkaroon ng pagsusuri at beripikasyon (The prosecutor should have also done what we call due diligence. There should be an evaluation and there should be validation),” giit pa niya.

Sabi ni Fadullon, maaaring magsagawa ng imbestigasyon ang Department of Justice (DOJ) kaugnay ng posibleng mga pagkukulang sa proseso na nagresulta sa paglalabas ng arrest warrant nang hindi nabibigyan ng pagkakataon ang respondent na magsumite ng kaniyang counter-affidavit o salaysay na panangga sa mga paratang.