Prosekusyon ng ICC, magdadala ng 5 saksi mula Pinas sa trial ni Duterte

Sinabi ni International Criminal Court (ICC) Prosecutor at Senior Trial Lawyer Julian Nicholls sa ikaapat na status conference sa kaso ni dating Pangulong Rodrigo Duterte nitong Martes na inaasahang dadalo ang limang saksi mula sa Pilipinas para tumestigo sa paglilitis nito, maliban kung may hindi inaasahang mangyari.

Ang mga saksi, na tinukoy sa mga dokumentong inihain sa korte gamit ang mga code number na 1302, 1100, 1400, 1263 at 0009, ay “lahat ay dadalo maliban kung may hindi inaasahang mangyari (all be present unless something unforeseen).”

“Depende sa ilang usaping pang-logistika, maaaring kailanganin naming pagpalitin ang ikalawa at ikatlong saksi. Pero sa palagay ko, hindi naman ito mangyayari. Sila ang limang saksi na itinakda naming tumestigo ngayong taon ([J]ust depending on some logistics, the second and third witnesses, we might have to swap them; I don't think so, but those are the five that we planned for this year),” ani Nicholls.

“Dahil hindi pa namin alam ang eksaktong iskedyul ng mga pagdinig noong binuo namin ang planong ito, kabilang kung ilang oras o araw ang ilalaan, sa palagay namin ay angkop ang bilang na ito ng mga saksi upang mapunan ang oras na nakalaan (Not knowing the exact sitting schedule when we put this together, how many hours or days, but this seems like an appropriate amount that we think would fill that time),” dagdag niya.

Ayon kay Nicholls, sinuri at pinagkumpara ng mga analyst ang isang malaking koleksiyon ng datos tungkol sa mga pagpatay sa mga operasyon ng pulisya, gayundin ang mga pagkamatay na iniimbestigahan kaugnay ng giyera kontra droga.

Sa nasabing datos, tinukoy nila ang humigit-kumulang 3,400 personalidad na may kaugnayan sa droga na nasawi sa mga operasyon laban sa ilegal na droga mula Hulyo 2016 hanggang Nobyembre 2017.

Binanggit din niya ang accomplishment report noong 2017 ng Presidential Communications Operations Office, na noon ay nasa ilalim ng administrasyong Duterte, kung saan nakasaad na 3,967 personalidad na may kaugnayan sa droga ang nasawi sa kaparehong panahon.

“Dito, inilista ng pangulo, sa pamamagitan ng Communications Office, bilang isa sa mga nagawa ng kaniyang administrasyon ang bilang ng mga nasawi mula Hulyo 1 hanggang Nobyembre 17. Ito rin ang kaparehong panahon na saklaw ng datos na sinuri namin at binilang nang paisa-isa sa bawat pahina (So here, the President, through the Communications Office, is listing as one of the accomplishments this number of persons who died from July 1 through November 17. That is the same time period for the dataset that we have gone through page by page and counted up),” aniya.

“Sa kabuuan, 3,422 pagkamatay ang aming binilang. Ang bilang na iminungkahi naming pagkasunduan ay 3,400. Samantala, 3,697 [SIC] pagkamatay naman ang iniulat ng administrasyon ng pangulo sa kaparehong panahon. Kaya hindi dapat maging mahirap na magkasundo sa bilang na ito (So, we've counted up 3,422 deaths. Our proposed agreed facts are 3,400 deaths. And the President's administration, for the same time period, says 3,697 [SIC] deaths. So, this shouldn't be difficult to come to an agreement on),” dagdag niya.

Samantala, iginiit ni Peter Haynes, pangunahing abogado ng depensa, na dapat pang pangunahan ng mga abogado ang pagsusuri sa mga dokumento. Inangkin din niyang gumamit ang prosekusyon ng artificial intelligence (AI) upang ibuod ang mga ito.

Itinuro ni Haynes na libo-libo ang mga dokumentong nakapaloob sa datos at nauna nang kinailangan ng isang institusyon ng malaking halaga ng mga mapagkukunan at isang taon upang masuri ang mga ito.

Itinanggi naman ni Nicholls ang pahayag ng depensa. Ayon sa kaniya, mano-manong sinuri ng mga analyst at ilang abogado ang mga dokumento, pahina kada pahina.

Sinabi ng ICC Trial Chamber III na balak nitong simulan ang mga pagdinig sa pamamagitan ng mas maikling iskedyul sa unang linggo. Magsisimula ang mga ito alas-10 ng umaga at magtatapos alas-4 ng hapon, oras sa The Hague, Netherlands, na may mga pahinga sa pagitan upang matugunan ang mga pangangailangan ni Duterte at maisaalang-alang ang availability ng mga saksi.