Dutch authorities, nag-alok ng €2M pabuya para maaresto ang most-wanted drug fugitive sa Europa

Nag-alok ang mga Dutch prosecutor ng rekord na €2 milyon o katumbas ng US$2.2 milyon na pabuya para sa sinumang makapagbibigay ng impormasyong magbibigay-daan sa pag-aresto kay Jos Leijdekkers, isang convicted cocaine kingpin at isa sa mga most-wanted drug fugitive sa Europa, ayon sa mga awtoridad nitong Lunes.

Si Leijdekkers ay isang Dutch national na ilang taon nang naninirahan sa Sierra Leone, ayon sa Dutch prosecution service. Hiniling na ng mga prosecutor ang kaniyang extradition o pagpapauwi sa Netherlands upang harapin ang mga kaso, ngunit tumangging makipagtulungan ang Sierra Leone. Dahil dito, nagpasya ang European Union na bawasan ang ilang tulong-pinansiyal sa bansa sa West Africa.

Ayon sa pahayag ng mga prosecutor, ito ang pinakamalaking pabuya na inialok ng mga awtoridad ng Netherlands, sa ngalan ng pag-aresto kay Leijdekkers. Kilala rin siya sa Netherlands sa mga pangalang Bolle Jos o Chubby Jos. Itinuturing siyang mahalagang personalidad sa pandaigdigang kalakalan ng cocaine. Ayon sa pulisya, ginagamit din niya ang pangalang Omar Sherrif sa Sierra Leone.

Noong nakaraang taon, hinatulan ng isang Dutch court si Leijdekkers, 35, ng 24 na taong pagkakakulong kahit wala siya sa paglilitis, dahil sa pagpupuslit ng mahigit pitong metriko tonelada ng cocaine. Nahaharap din siya sa ilang nagpapatuloy na imbestigasyon ng pulisya sa Netherlands.

Sa kalapit na Belgium, hinatulan naman siya ng isang korte ng 79 na taong pagkakakulong.

Tinataya ng mga awtoridad ng Netherlands na kumita si Leijdekkers ng sampu-sampung milyong euro mula sa pagpupuslit ng cocaine. Pinaghihinalaan din siyang sangkot sa money laundering at paggamit ng matinding karahasan, ayon sa mga awtoridad.

($1 = 0.8846 euros)