DepEd, naglabas ng mga alituntunin sa kaligtasan sa paaralan at pagpapatuloy ng pag-aaral sa gitna ng matinding El Niño

MANILA – Upang matiyak ang kaligtasan at pagpapatuloy ng pag-aaral sa kabila ng nakaambang epekto ng “napakalakas” na El Niño, naglabas ang Department of Education (DepEd) ng komprehensibong mga alituntunin na ipatutupad sa mga paaralan sa buong bansa.

Sa isang pahayag, sinabi ni DepEd Secretary Sonny Angara na layunin ng mga maagap na hakbang na mapanatili ang ligtas na kapaligiran sa pag-aaral at mapangalagaan ang kapakanan ng mga mag-aaral, guro, at iba pang kawani ng paaralan.

“Hindi natin maaaring hintayin pang maranasan ang matinding init bago tayo kumilos. Ang ating plano ngayong taon ay maagap, pinag-isipan, at organisado (We cannot afford to wait until extreme heat hits before we act. Our plan this year is proactive, deliberate, and organized),” ani Angara.

Sa ilalim ng DepEd Memorandum No. 64, series of 2026, kailangang magpatupad ang mga paaralan ng iba't ibang hakbang batay sa tindi ng inaasahang tagtuyot sa kani-kanilang lugar, sa halip na magpatupad ng pangkalahatang suspensyon o pagpapatuloy ng klase.

Gagamit ang mga pamunuan ng paaralan ng isang praktikal na sistema ng pagpapasya na nakabatay sa lokal na kondisyon, gamit ang araw-araw na pagsukat sa temperatura at halumigmig sa loob ng mga silid-aralan tuwing alas-8 ng umaga, alas-12 ng tanghali, at alas-2 ng hapon.

Nauna nang inanunsyo ng DepEd ang pagpapatupad ng 4H framework na binubuo ng Hayo, Hinay, Hinga, at Hinto.

Sa ilalim ng sistemang ito, magpapatuloy ang harapang klase kung kaya pang pamahalaan ang kondisyon ng init; ipatutupad ang binago o organisadong blended learning kapag may panganib ng heat stress; babawasan ang mga gawaing pang-akademiko at magbibigay ng learning packets sa panahon ng matinding init o kakulangan sa tubig; at sususpendihin ang klase kapag umabot sa mapanganib na antas sa kalusugan ang heat index.

“Sa pamamagitan ng ating 4H framework at araw-araw na pagsubaybay sa kondisyon ng bawat silid-aralan, binibigyan natin ng kakayahang magpasya ang mga pinuno ng paaralan na baguhin ang oras ng klase o lumipat sa modular learning kung talagang kinakailangan ng lokal na sitwasyon (Through our 4H framework and daily, classroom-level monitoring, we are empowering our school heads with the flexibility to adjust hours or shift to modular learning only when local conditions genuinely require it),” ani Angara.

Ipapatupad ang Hayo kapag nananatiling mas mababa sa 27°C ang heat index, kasabay ng nakatakdang mga pahinga upang makainom ng tubig ang mga mag-aaral.

Kapag umabot naman sa 27°C hanggang 32°C ang heat index, ipatutupad ang Hinay, kung saan maaaring paikliin ng mga pinuno ng paaralan ang oras ng harapang klase o lumipat sa hybrid at flexible home-based learning schedules.

Sa heat index na 33°C hanggang 41°C, na nangangailangan ng matinding pag-iingat, ipatutupad ang Hinga. Sa ilalim nito, sususpendihin ang harapang klase at papalitan ng mas magagaan na gawaing maaaring gawin sa bahay, kasabay ng pagsubaybay sa kalagayan ng kalusugan ng mga mag-aaral.

Samantala, ang Hinto ang pinakamapanganib na antas na ipatutupad kapag umabot sa 42°C o higit pa ang heat index. Sa ganitong kondisyon, ganap na sususpendihin ang lahat ng pisikal at home-based na gawaing pang-akademiko.

Bukod sa pagpapatupad ng 4H framework, kailangang suriin ng mga paaralan kung maaasahan ang kanilang suplay ng malinis na tubig, maglaan ng mga ligtas na istasyon ng inuming tubig, at maghanda para sa agarang pagbili ng mga water filtration kit kung kinakailangan.

Dapat ding ipagpatuloy ang mga school-based feeding program, kasabay ng pagpapatupad ng mga hakbang pangkaligtasan tulad ng inspeksyon sa mga instalasyong elektrikal at paglilinis ng mga tuyong halaman alinsunod sa Fire Code of the Philippines.

Maaari ring magsuot ang mga mag-aaral, guro, at iba pang kawani ng disente, magaan, at preskong alternatibong uniporme o mga naunang ipinamigay na DepEd collared shirt.

“Tinitiyak nating ganap na handa ang ating mga paaralan sa pagharap sa heat stress, kakulangan sa tubig, at mga panganib sa kalusugan upang mapangalagaan ang kaligtasan at kapakanan ng ating mga mag-aaral at kawani nang hindi kinakailangang isakripisyo ang mahalagang oras ng pag-aaral (We are making sure our schools are fully prepared to manage heat stress, water shortages, and health risks, protecting the safety and well-being of our learners and personnel without unnecessarily sacrificing precious classroom time),” ani Angara.

Bukod sa mga panandaliang solusyon, muling iginiit ng DepEd na pinag-aaralan din nito ang mga pangmatagalang hakbang upang maisulong ang posibleng paggamit ng solar energy sa mga pampublikong paaralan.