Comelec, inaasahang mas marami ang magpaparehistro sa muling pagbubukas ng voter registration

MANILA — Inaasahan ng Commission on Elections (Comelec) na mas maraming Pilipino ang magpaparehistro sa muling pagbubukas ng voter registration sa Nobyembre para sa May 2028 National and Local Elections (NLE).

Tatagal nang walong buwan ang pagpaparehistro ng mga botante, na inaasahang maghahatid ng mataas na bilang ng mga magpaparehistro, ayon kay Comelec Chairperson George Garcia.

“Dahil dito, inaasahan nating ang mga magpaparehistro, magpapalipat ng rehistro, o magpapa-reactivate ng kanilang voter registration status ay makakalahok sa 2028 national and local elections, gayundin sa Barangay at Sangguniang Kabataan elections (BSKE). Inaasahan natin ang mataas na bilang ng mga magpaparehistro dahil sa pinalawig na panahon (Consequently, we can expect that those who register, transfer, or reactivate their status will be able to participate in the 2028 national and local elections, as well as the Barangay and SK elections (BSKE). We anticipate a high volume of registrants given the extended timeframe),” pahayag ni Garcia sa isang panayam nitong Sabado.

Target ng Comelec na muling buksan ang voter registration sa kalagitnaan ng Nobyembre at ipagpatuloy ito hanggang sa katapusan ng Hulyo 2027.

Nang tanungin kung bakit hanggang Hulyo 2027 lamang ang panahon ng pagrerehistro, sinabi ni Garcia na nais ng Comelec na matiyak na maayos na maihahanda ang listahan ng mga botante, ang pagpaplano ng mga presinto, at ang mga pagdinig ng Election Registration Board (ERB).

Ayon kay Garcia, ito ang pinakaangkop na panahon para maisagawa ng Comelec ang proseso.

Muling bubuksan ng Comelec ang voter registration matapos ipagpaliban ang BSKE at itakda ang halalan sa Nobyembre 2028.

Noong Huwebes, nilagdaan ni Pangulong Ferdinand R. Marcos Jr. ang Republic Act 12326, na nagtatakda ng limang taong termino para sa mga opisyal ng barangay at mga miyembro ng Sangguniang Kabataan, at nagpapaliban sa BSKE hanggang Nobyembre 2028.