Baril na pag-aari ng empleyado ng DepEd, ginamit ng suspek sa pamamaril sa paaralan sa Cotabato

KORONADAL CITY — Anak ng isang empleyado ng Department of Education (DepEd) ang suspek sa pamamaril sa isang paaralan sa Banga, South Cotabato, na siyang nagmamay-ari ng baril, ayon sa alkalde ng bayan nitong Sabado.

Hindi muna ibinunyag ni Banga Municipal Mayor Albert Palencia ang pagkakakilanlan ng empleyado ng DepEd at ng kanyang anak habang nagpapatuloy ang imbestigasyon.

Gayunman, sinabi ni Palencia na ayon sa ina ng suspek, sinira ng kanyang 14-anyos na anak ang vault kung saan nakatago ang Glock 9mm pistol.

Nangyari ang insidente bandang alas-1:15 ng hapon nitong Biyernes sa isa sa mga classroom ng Grade 9 students sa Banga National High School sa Barangay Benitez.

Tatlong estudyante ang nasawi, kabilang ang suspek, habang anim na iba pa ang nasugatan. Pawang mga estudyante ang mga biktima.

Ayon kay South Cotabato Governor Reynaldo Tamayo, na sinabi rin ng isang kaibigan ng suspek, miyembro umano ang shooter ng isang online gaming group na tinatawag na “True Crime Community.”

Sinabi ni Tamayo na tinitingnan ng pulisya ang mga ulat na nag-uugnay sa online community sa estudyante. Binigyang-diin niya na hindi dapat gumawa ng anumang konklusyon habang nagpapatuloy ang imbestigasyon.

“Walang magulang ang dapat mawalan ng anak dahil sa karahasan, lalo na kung nangyari ito sa loob ng paaralan. Ang paaralan ay lugar kung saan dapat ligtas ang ating mga anak (No parent should lose a child due to violence, especially if it happened inside the school campus. The school is a place where our children should be safe),” ani Tamayo.

“Bilang mga magulang at miyembro ng komunidad, dapat tayong magtulungan upang maprotektahan ang ating mga anak (As parents and members of the community, we should work together to protect our children),” aniya. Idinagdag niya na dapat kausapin ng mga magulang ang kanilang mga anak tungkol sa mga aktibidad sa paaralan, paggamit nila ng social media, at suportahan sila sa lahat ng aktibidad sa campus.

Samantala, sinabi ni Department of Social Welfare and Development (DSWD)–Soccsksargen Director Loreto Cabaya Jr. na makatatanggap ng P10,000 cash assistance mula sa pamahalaan ang bawat estudyanteng nasugatan sa pamamaril.

“Makakatanggap din ng tulong pinansyal mula sa DSWD ang mga pamilya ng tatlong nasawi (The families of three fatalities will also receive financial aid from the DSWD),” ani Cabaya.