Abo mula sa wildfire, nagpaitim sa ilog sa Spain; suplay ng tubig, nakontamina

Isang ilog na dumadaloy sa isang bayan sa gitnang bahagi ng Spain ang naging itim dahil sa abo at mga debris mula sa wildfire. Nagdulot ito ng kontaminasyon sa lokal na suplay ng inuming tubig at nagtulak sa mga residente na umasa sa mga emergency supply.

Sa bayan ng Casavieja sa lalawigan ng Avila, kung saan dumadaloy ang ilog mula sa kabundukan patungo sa Tietar River, naging kulay itim na parang tinta ang tubig dahil sa agos ng tubig-ulan na may halong abo. Pumila ang mga residente sa mga fountain at water tanker upang kumuha ng malinis na inuming tubig, habang namahagi rin ang mga awtoridad ng de-boteng tubig.

“Para sa pag-inom, pagluluto, paggamit sa banyo, para sa lahat. Tubig—doon mo lang talaga malalaman kung gaano ito kahalaga kapag wala ka na nito (To drink, to cook, for the bathroom, for everything. Water: you only realize how much you need it once you don't have it anymore)," sabi ng residenteng si Miguel Angel Perez Sanchez.

Ayon kay Casavieja Mayor Vanessa Muñoz, lalo pang pinalala ng malalakas na pag-ulan ang pinsalang dulot ng mga wildfire. Tinangay ng rumaragasang tubig ang mga tulay at nagdala ng mga agos ng tubig na may halong abo patungo sa isang reservoir na nagsisilbing backup na pinagkukunan ng tubig ng bayan.

“Pangunahin kaming naapektuhan dahil pumasok ito sa reservoir, na siyang aming suplay ng tubig at bahagi ng aming emergency plan nang magsimula ang unang pag-ulan (It affected us mainly because it entered the reservoir, which was our water supply and our emergency plan when the first rains arrived)," saad niya sa regional broadcaster na Castilla y Leon TV.

Samantala, sinabi ni Santiago M. Barajas, isang agronomist at co-founder ng environmental group na Ecologistas en Accion, sa isang post sa X: “Patuloy ang epekto ng mga wildfire kahit matapos na ang mga ito (The impacts of the fires continue after they have been extinguished)."

“Matapos ang malalakas na pag-ulan, halos hindi nasasala ng lupang walang mga halaman ang tubig, kaya mabilis itong umaagos na maputik, na para bang ginawa ng abo na hindi madaanan ng tubig ang lupa (After torrential rains, the water barely filters into the soil without vegetation and rushes away muddy at great speed, as if the ashes had made it impermeable)."

Sa kalapit na bayan ng Piedralaves, nagtutulungan ang mga awtoridad at ang water utility na Aqualia upang maibalik sa normal ang suplay ng tubig matapos maanod ang abo patungo sa mga water catchment kasunod ng mga pag-ulan. Dahil dito, idineklara ng mga opisyal na hindi ligtas para sa pagkonsumo ang tubig mula sa gripo.

Ang apektadong lugar ay nasa ibabang bahagi ng Burgohondo wildfire sa Avila, isa sa pinakamalalaking wildfire sa Spain ngayong taon. Umabot sa 33,943 ektarya (83,875 acre) ang nasunog, o mahigit 15% ng kabuuang lawak ng lupang winasak ng mga wildfire sa buong bansa, ayon sa datos ng Environment Ministry.

Sinabi naman ni Jose Maria Manso, alkalde ng kalapit na bayan ng El Barraco, na maaaring makarating sa kalaunan ang abo at sediment sa El Burguillo reservoir, na mahalagang pinagkukunan ng inuming tubig ng mga komunidad sa paligid.