820,000 deboto dumalo sa Peñafrancia procession sa Naga

LEGAZPI CITY – Tinatayang 820,000 deboto ang lumahok sa prusisyon ng traslacion nitong Biyernes ng gabi bilang bahagi ng Peñafrancia Festival 2026 sa Naga City, ayon sa Police Regional Office in Bicol (PRO-5) nitong Sabado.

Ayon kay PRO-5 Director Brig. Gen. Randy Glenn Silvio, naging mapayapa, maayos at ligtas sa pangkalahatan ang prusisyon ng traslacion.

Nagpakalat ang pulisya ng mga tauhan sa mga estratehikong lugar, partikular sa mga lokasyong tinukoy na maaaring pagmulan ng pagsisikip ng mga tao.

Bilang bahagi ng mga hakbang pangkaligtasan, gumamit ang pulisya ng mga plakard at paalala sa publiko upang hikayatin ang mga deboto na ingatan ang kanilang mga gamit, manatiling hydrated, huwag mahiwalay sa kanilang mga kasama, at iulat sa mga awtoridad ang anumang kahina-hinalang aktibidad o emergency.

Nagpaabot din ng mga paalala at abiso sa kaligtasan ang Oplan Bandillo ng pulisya, at binigyang-diin ang kahalagahan ng pakikipagtulungan, disiplina at pagsunod sa safety measures habang isinasagawa ang prusisyon.

Naglagay din ng mga closed-circuit television o CCTV camera at gumamit ng mga drone sa mga estratehikong lugar upang subaybayan ang galaw ng mga tao at mabigyan ang security personnel ng real-time situational awareness.

Nakatulong din ang mga Starlink device sa komunikasyon ng mga police unit, lalo na sa mga lugar kung saan maaaring humina o maantala ang communication network dahil sa dami ng mga tao.

“Ang mapayapa at maayos na pagsasagawa ng traslacion ay tagumpay nating lahat. Nagpapasalamat kami sa ating mga deboto, sa komunidad ng Bicol, mga katuwang na ahensya, lokal na pamahalaan, force multipliers at mga boluntaryo sa kanilang pakikipagtulungan at suporta (The peaceful and orderly conduct of the traslacion is a shared accomplishment. We thank our devotees, the Bicolano community, our partner agencies, local government units, force multipliers and volunteers for their cooperation and support),” ani Silvio.

“Patunay ang matagumpay nating operasyon sa seguridad sa sama-samang hangarin nating protektahan ang ating mga kababayan habang binibigyan sila ng pagkakataong maisagawa nang ligtas at mapayapa ang mahalagang tradisyong panrelihiyon (The success of our security operations reflects our collective determination to protect our people while allowing our devotees to observe this important religious tradition safely and peacefully).”

Sinabi ni Silvio na magpapatuloy ang operasyon ng seguridad hanggang sa pagtatapos ng Peñafrancia Festival, kung saan itatampok ang fluvial procession sa Naga River sa Setyembre 19.

Ipinagdiriwang sa festival ang patrona ng Bicol na Our Lady of Peñafrancia, na tinatawag na “Ina,” at itinuturing na pinakamalaking Marian event sa Asya.