140 pasahero, nawawala matapos lumubog ang isang pampasaherong barko sa Indonesia

JAKARTA — Patuloy ang paghahanap ng mga rescue worker sa Indonesia nitong Linggo sa 140 katao na nawawala matapos lumubog ang isang pampasaherong barko sa Java Sea. Samantala, 103 iba pa ang nailigtas, ngunit isa sa kanila ang nasawi, ayon sa isang opisyal ng search and rescue agency.

Base sa kanilang ulat, nawalan ng kontak ang barkong may sakay na 243 katao habang masama ang panahon noong madaling araw ng Linggo.

Ang barkong Virgo Transport 8 ay naglayag noong Sabado mula sa Surabaya sa East Java patungo sa Banjarmasin sa South Kalimantan.

Kalaunan, kinumpirma ng ahensya na lumubog ang barko, ngunit hindi ito nagbigay ng karagdagang detalye.

Sa isang video statement, sinabi ni I Putu Sudayana, hepe ng tanggapan ng ahensiya sa Banjarmasin, na 103 katao ang nailigtas gamit ang iba’t ibang barko. Ang ilan sa mga ito ay dadalhin sa isang pantalan sa East Java.

Ayon kay Sudayana, nagsimula na ang mga rescue worker sa paghahanap sa mga nawawala. Nagpadala sila ng isang team, mga barko, at isang helicopter patungo sa huling natukoy na lokasyon ng pampasaherong barko.

Ang Indonesia, na binubuo ng humigit-kumulang 17,000 isla, ay lubos na umaasa sa mga ferry bilang pangunahing paraan ng transportasyon. Mas abot-kaya at mas madaling mapakinabangan ang mga rutang pandagat kumpara sa paglalakbay sa himpapawid.

Gayunman, hindi palaging mahigpit na naipatutupad ang mga pamantayan sa kaligtasan ng mga sasakyang pandagat, na nagiging dahilan ng mataas na bilang ng mga aksidente sa bansa.