1.25 milyong pasahero, inaasahang dadagsa sa NAIA mula Oktubre 27 hanggang Nobyembre 4 ngayong Undas

Inaasahang aabot sa 1.25 milyong pasahero ang dadagsa sa Ninoy Aquino International Airport (NAIA) mula Oktubre 27 hanggang Nobyembre 4 ngayong taon, mas mataas kumpara sa 1.24 milyon sa kaparehong panahon noong 2025.

Ayon sa New NAIA Infra Corp. (NNIC), na pinamumunuan ng San Miguel Corp., inaasahang papalo sa pinakamataas ang bilang ng mga pasahero sa Oktubre 30, na tinatayang aabot sa 149,000 biyahero.

Dahil sa inaasahang pagdagsa ng mga pasahero, sinabi ng NNIC sa isang pahayag nitong Lunes na paiigtingin nito ang seguridad at pakikipag-ugnayan sa mga airline, ground handler, transport provider, at mga ahensya ng pamahalaan.

Isang 24-oras na command center sa Terminal 2 ang mangangasiwa sa koordinasyon at pagtugon sa mga insidente upang agad na matugunan ng mga tauhan ng paliparan at mga ahensya ng gobyerno ang anumang aberya sa operasyon.

Asahan din ng mga pasahero ang mas mahigpit na seguridad, kabilang ang dagdag na police patrol sa mga pasukan ng terminal, mga lugar na sakayan at babaan ng pasahero, at mga paradahan.

Magkakaroon din ng K-9 patrol, mas mahigpit na kontrol sa pagpasok sa mga terminal, at karagdagang immigration, customs, at quarantine counter sa mga oras na pinakamaraming pasahero.

Magpapatuloy naman ang 24/7 na operasyon ng mga public assistance desk sa arrival at departure area ng lahat ng tatlong terminal.

Magdadagdag din ng mga traffic marshal at porter, gayundin ng mga baggage cart para sa mga pasahero.

Samantala, sinabi ng NNIC na mahigpit nitong makikipag-ugnayan sa mga kinauukulan hinggil sa pagsasaayos ng paradahan ng mga eroplano upang mabigyang-daan ang mga karagdagang biyahe o hindi nakaiskedyul na flight at mabawasan ang pagkaantala.

Patuloy ring babantayan ng mga operations team ang galaw ng mga eroplano, paghawak sa mga bagahe, at pagsisikip sa mga pasukan ng terminal, check-in counter, at boarding gate.

Makikipagtulungan din ang mga ito sa mga airline at ground handler upang matugunan ang pagsisikip sa operasyon at mga aberya sa mga flight, dagdag ng NNIC.

—Sari Story Network