Marcos sa hukom: Isaalang-alang ang epekto ng batas sa buhay ng mga Pilipino hindi lang teknikalidad

Binati ni Pangulong Ferdinand R. Marcos Jr. ang halos 160 bagong talagang hukom mula sa iba’t ibang rehiyong panghukuman sa buong bansa sa isang salu-salong may meryenda at hapunan sa Palasyo ng Malacañang.

Ipinahayag ni Marcos ang kanyang tiwala sa kakayahan at integridad ng mga bagong hukom sa pagsisimula nila ng kanilang mga tungkulin alinsunod sa pananaw ng Bagong Pilipinas. Hinimok din niya silang panatilihin ang pinakamataas na pamantayan ng integridad, pagiging walang kinikilingan, at pananagutan sa pagpapatupad ng katarungan, pagtiyak sa wastong proseso ng batas, at pagtataguyod ng pantay na pagkakataon para sa lahat ng Pilipino na makamit ang katarungan.