Malayang midya, kailangan ng pangmatagalang suporta

Kapag napuputol ang ugnayan ng mga komunidad dahil sa labanan, napapaalis dahil sa karahasan, o nagsisikap na mabuhay sa gitna ng isang humanitarian crisis, lalo pang nagiging mahalaga ang pagkakaroon ng maaasahang impormasyon.

Kadalasan, ang mga lokal na mamamahayag at mga media outlet na nagsusulong ng interes ng publiko ang tanging may kakayahang maabot ang mga komunidad na ito sa sarili nilang wika at sa pamamagitan ng mga pinagkakatiwalaang daluyan. Sa pamamagitan nito, naibibigay sa kanila ang impormasyong kailangan upang makagawa ng mga desisyon, makakuha ng tulong, at panagutin ang mga nasa kapangyarihan.

Kinikilala ito ng mga humanitarian organization. Umaasa ang mga ito sa lokal na media upang maabot ang mga apektadong mamamayan sa paraang mahirap tumbasan ng ibang mga organisasyon. Ngunit ang mga media organization na ito rin ang kabilang sa mga higit na nanganganib na hindi makaligtas kung walang tuloy-tuloy at pangmatagalang suporta mula sa labas.

Patuloy na nagsisikap ang mga network na nakatuon sa pagsuporta sa media, gaya ng Global Forum for Media Development at IFPIM, na kumbinsihin ang mga gumagawa ng polisiya at mga donor na ipinakikita ng ebidensiya na walang matatag na lipunan kung walang matibay na imprastraktura para sa media at impormasyon.

Ang pagpapatakbo ng media sa mga marupok at apektado ng tunggalian na mga lugar ay nangangahulugan ng patuloy na pagharap sa kawalan ng seguridad, maling impormasyon at disinformation, sapilitang paglikas, pampulitikang panggigipit, at kawalang-katiyakan sa kabuhayan.

Alam ng Fondation Hirondelle, isang organisasyong nagsusulong ng media development na may mahigit 30 taong karanasan sa mga ganitong sitwasyon, ang hirap ng pagtatatag at pagpapanatili ng media na nagsisilbi sa interes ng publiko sa kabila ng iba’t ibang hamon.

Ang panandalian at nakabatay sa proyekto na pagpopondo—na siya pa ring pangunahing modelo—ay hindi nakatutulong sa pagbuo ng matatatag na newsroom. Sa halip, lumilikha ito ng mga newsroom na walang katiyakan.

Napipilitan ang mga editorial team na habulin ang mga grant cycle sa halip na ituon ang kanilang oras at kakayahan sa paglilingkod sa kanilang mga audience. Higit na nabibigyang-halaga nito ang pagiging kapansin-pansin kaysa sa lalim ng pamamahayag, at ang dami ng aktibidad kaysa sa pangmatagalang epekto.

Sa World News Day 2026, muli tayong pinaaalalahanan sa kahalagahan ng pagpapakita kung ano ang kinakailangan upang makalikha ng makabuluhang pamamahayag. Pinatitibay ito ng mga ebidensiya at akademikong pananaliksik, kabilang ang pandaigdigang panawagan ng mga nangungunang ekonomista na kumikilos para sa proteksiyon ng media na nagsisilbi sa interes ng publiko, bilang suporta sa pag-unlad ng ekonomiya at pag-unlad ng sangkatauhan.

Ngunit ang pagkilala sa halaga ng independenteng pamamahayag ay nangangahulugan din ng pagtatanong kung ano ang kailangan upang magpatuloy ito. Kung seryoso tayo sa pagkilala sa independenteng pamamahayag bilang haligi ng demokrasya at katatagan, kailangan natin ng mga balangkas sa pagpopondo na tunay na sumasalamin sa pangakong iyon.

Lalong mahalaga ang tanong na ito sa kasalukuyan. Patuloy na nahaharap sa matinding pressure ang pandaigdigang pondo para sa media at development, habang lumalaki naman ang pangangailangan para sa maaasahan at independenteng impormasyon. Kasabay nito, gumagawa ang malalaking donor ng mga desisyong makaaapekto sa kanilang mga prayoridad sa mga darating na taon.

Isang mahalagang halimbawa nito ang negosasyon ng European Union para sa susunod nitong Multiannual Financial Framework. Ang mga desisyong kasalukuyang binubuo ay magtatakda sa magiging external action ng EU mula 2028 pataas.

Nasa sentro ng balangkas na ito ang Global Europe instrument, kung saan sinusuportahan ng EU ang demokrasya, karapatang pantao, katatagan, development, at humanitarian action sa mga partner country.

Ang mga magiging desisyon sa paraan ng paglalaan ng mga pondong ito ay direktang makaaapekto sa limitado nang bahagi ng international assistance na napupunta sa media na nagsisilbi sa interes ng publiko—kabilang ang mga marupok at apektado ng tunggalian na lugar kung saan higit na kinakailangan ang ganitong suporta.

Kung walang malinaw na pagkilala sa independenteng pamamahayag bilang mahalagang demokratikong imprastraktura, at walang flexible at pangmatagalang mekanismo ng pagpopondo na naaayon dito, nanganganib na maulit ang mga sistemikong pagkukulang na matagal nang dahilan kung bakit kapos sa pondo ang media na nagsisilbi sa interes ng publiko.

Hindi lamang ito usapin ng pagprotekta sa mga media organization. Kapag nawala ang isang independenteng newsroom, higit pa sa isang pinagkukunan ng balita ang nawawala sa mga komunidad.

Nawawala rin sa kanila ang access sa beripikadong impormasyon, isang lugar para sa pampublikong talakayan, at kadalasan, isang daluyan upang makarating sa mga gumagawa ng desisyon ang kanilang mga hinaing.

Dahil dito, hindi dapat ituring na opsyonal na dagdag lamang sa mga programa para sa demokrasya, development, o humanitarian action ang pagpopondo para sa independenteng media.

Ang maaasahang impormasyon ay bahagi ng imprastrakturang nagbibigay-daan upang magtagumpay ang mga pagsisikap na ito.

Ang World News Day 2026 ay pagkakataon upang maipakita kung ano ang naiaambag ng pamamahayag sa mga lipunan sa buong mundo—lalo na sa mga lugar kung saan mahirap, mapanganib, at marupok sa aspetong pang-ekonomiya ang paghahatid ng maaasahang impormasyon.

Patuloy na gagawin ng mga mamamahayag at media organization ang kanilang tungkulin dahil naniniwala sila sa halaga nito. Ngunit hindi sapat ang dedikasyon lamang upang mapanatili ang independenteng pamamahayag.

Kung nais nating manatiling naroroon ang media na nagsisilbi sa interes ng publiko sa mga panahong higit na nangangailangan dito ang mga komunidad, kailangan nito ng tiyak, flexible, at pangmatagalang suporta.

Si Caroline Vuillemin ang director general ng Fondation Hirondelle.

Ang opinion piece na ito ay kinomisyon bilang bahagi ng World News Day, isang pandaigdigang kampanya na nagbibigay-diin sa mahalagang papel ng pamamahayag sa paghahatid ng mga katotohanan at malinaw na impormasyon.

Dapat panatilihin ng mga muling maglalathala ang talatang nasa itaas at bigyang-kredito ang orihinal na awtor.

Malayang maaaring muling ilathala ang buong artikulo at malayang isalin, basta’t tapat na naipapahayag ng salin ang orihinal at hindi binabago ang kahulugan o nilalaman nito. Pinahihintulutan ang maliliit na pagbabago para sa haba o house style, alinsunod sa parehong kondisyon.

Kung maaari, maglagay ng link patungo sa World News Day (worldnewsday.org).